ქართული ოცნების პრემიერმინისტრი, ირაკლი კობახიძე ჩინეთის პრემიერმინისტრის, ლი ციანის მიწვევით შანხაიში ვიზიტს გამართავს. ადმინისტრაციის ინფორმაციით, გამოფენაზე 40-ზე მეტი ქართული კომპანია იქნება წარმოდგენილი

"ვიზიტის ფარგლებში დაგეგმილია ირაკლი კობახიძის შეხვედრა ჩინეთის პრემიერმინისტრთან.

გარდა ამისა, ირაკლი კობახიძე მონაწილეობას მიიღებს ჩინეთის იმპორტის საერთაშორისო გამოფენის გახსნის ცერემონიაში, სადაც საქართველო წელს საპატიო სტუმრის სტატუსით მონაწილეობს. გამოფენაზე 40-ზე მეტი ქართული კომპანია იქნება წარმოდგენილი," — ვკითხულობთ ადმინისტრაციის განცხადებაში.

განცხადებაში ვკითხულობთ, რომ კობახიძესთან ერთად დელეგაცია გაემგზავრება — საგარეო საქმეთა მინისტრი მაკა ბოჭორიშვილი, ეკონომიკისა და მდგრადი განვითარების მინისტრი მარიამ ქვრივიშვილი, გარემოს დაცვისა და სოფლის მეურნეობის მინისტრი დავით სონღულაშვილი, ფინანსთა მინისტრი ლაშა ხუციშვილი, ინფრასტრუქტურის მინისტრი რევაზ სოხაძე, ეროვნული ბანკის პრეზიდენტი ნათია თურნავა და მთავრობის ადმინისტრაციის უფროსი ლევან ჟორჟოლიანი.