2 ნოემბერს, 71 წლის აფხაზეთიდან დევნილი აზა ჩილაჩავა, "გზის უკანონო გადაკეტვის" ბრალდებით, რუსთაველის გამზირზე დააკავეს. ჩილაჩავას ადვოკატის, მარიამ პატარიძის ცნობით, 71 წლის ქალმა იზოლატორში მშრალი შიმშილობა დაიწყო.

"ახლა მხოლოდ იმაზე ვფიქრობ, როგორ დავტოვეთ იზოლატორში ადვოკატებმა 71 წლის აზა ბებო, რომელსაც დაკავებისას პოლიციამ 2.55 ლარი დაულუქა.

იმასაც წარმოვიდგენ, საკუთარი სახლიდან დევნილი, როგორ ათენებს პირველ ღამეს დმი-ს ოთახში, რომელიც როგორც გვითხრა, იმაზე დიდი ყოფილა, ვიდრე მისი საცხოვრებელი.
რაც არ მაძინებს უღონობის შეგრძნებაა. 71 წლის დევნილმა ქალმა მშრალი შიმშილობა გადაწყვიტა და ამაზე საუბრისას შეუვალი იყო: მე ჩემი პროტესტი მაქვს! ყოველ ჩვენს თხოვნაზე ამ სიტყვებს მტკიცედ გვიმეორებდა.

ცრემლები რამდენჯერმე მოერია და მხოლოდ მაშინ, როცა ახალგაზრდებზე საუბრობდა — იმ ახალგაზრდებზე, რომლებიც აფხაზეთში დატოვა და მათზე, ვინც ახლა ნათელი მომავლისთვის რუსთაველზე იბრძვის.

არ ინერვიულოთ და ჩემთვის ნუ წუხდებითო, ამ უხერხულობით დაგვემშვიდობა," — წერს ადვოკატი.

ცნობისთვის, 22 ოქტომბერს მოსამართლე თორნიკე ქოჩქიანმა აზა ჩილაჩავა "სახის დაფარვისთვის" სამართალდამრღვევად ცნო და აღმკვეთი ღონისძიების სახით, სიტყვიერი გაფრთხილებით შემოიფარგლა.