სასამართლომ, სამსახურებრივი უფლებამოსილების ბოროტად გამოყენების ფაქტზე, შემოსავლების სამსახურის უფროსის ყოფილ მოადგილეს, ვლადიმერ ხუნდაძეს, აღკვეთის ღონისძიების სახით პატიმრობა დაუსწრებლად შეუფარდა.

ხუნდაძის ადვოკატმა "ტვ პირველთან" საუბრისას განაცხადა, რომ მისი დაცვის ქვეშ მყოფმა მანამ დატოვა საზღვარი, სანამ მის წინააღმდეგ სამართლებრივი დევნა დაიწყებოდა. ადვოკატის ინფორმაციით, დაკავებულია ვლადიმერ ხუნდაძის ძმა.

"მას შეგნებულად არ დაუტოვებია საქართველოს რესპუბლიკა. არ ყოფილა არცერთ ეტაპზე დაკითხული, არც ეჭვმიტანილი, არც ბრალდებული. მან არ იცოდა მის მიმართ აღძრული, რომ იყო სისხლის სამართლის საქმე. თავისი ჯანმრთელობის ურთულესი მდგომარეობიდან გამომდინარე, ყოველგვარი დაბრკოლების გარეშე გადალახა საქართველოს საზღვარი და გადავიდა თურქეთის რესპუბლიკაში. [სანამ მის ძმას დააკავებდნენ], მანამდე დატოვა საქართველო. არანაირი პირდაპირ ბრალდება მის წინააღმდეგ არ არსებობს, არც მტკიცებულებებია, არსებობს ერთადერთი მოწმის არაპირდაპირი ჩვენება, რომელიც ამბობს, რომ არანაირი ფულ არ მოუთხოვია," — განაცხადა ადვოკატმა.

შეგახსენებთ, პროკურატურის განმარტებით, ვლადიმერ ხუნდაძეს პირადი ნაცნობობა აკავშირებდა ბორის გოგიჩაიშვილთან, რომელიც თანამზრახველებთან ერთად ქალაქ გორში უცხოური ბრენდების სასაქონლო ნიშნის გამოყენებით უკანონოდ ახორციელებდა ალკოჰოლური სასმელების — ვისკისა და არყის დამზადებასა და შენახვას.