ძლიერი საქართველო — ლელოს ერთ-ერთი ლიდერი მამუკა ხაზარაძე ოცნების ხელისუფლების მიერ "იგლ ჰილსთან" გაფორმებულ ხელშეკრულებას ეხმაურება, რომლის ფარგლებშიც $6.5 მლრდ-იანი არაბული ინვესტიციის ფარგლებში "იგლ ჰილსი" თბილისსა და გონიოში დეველოპერულ პროექტებს განახორციელებს.

მამუკა ხაზარაძე წერს, რომ ამ გარიგებით "თბილისსა და გონიოში თითქმის 800 ჰექტარზე 2 ანკლავი გაჩნდება და მივიღებთ 2 დასახლებულ არაბულ სატელიტ ქალაქს ბათუმსა და თბილისში. ძლიერი საქართველო — ლელოს" ლიდერი ოცნებას მოუწოდებს, დაუყოვნებლივ გაასაჯაროოს არაბებთან დადებული ხელშეკრულება.

"საქართველოში ორი არაბული ქალაქის აშენებას აპირებენ. თბილისსა და გონიოში თითქმის 800 ჰექტარზე ორი ანკლავი გაჩნდება. ეს ამსტერდამის ცენტრის ან ნიუ-იორკში, მანჰეტენის ზომის ტერიტორიაა. უკვე დაანონსებულ ფასს მხოლოდ არაბები თუ შესწვდებიან, რადგან ქართველისთვის დღეს ეს შეუძლებელია. ამ გარიგებით მივიღებთ ორ დასახლებულ არაბულ სატელიტ ქალაქს ბათუმსა და თბილისში.

სახელმწიფოს არაფერი ესაქმება კერძო დეველოპერულ კომპანიაში აქციონერად. არსებობს საფუძვლიანი ეჭვი, რომ საქმე გვაქვს კორუფციულ გარიგებასთან, ან პირდაპირ რომ ვთქვათ — ივანიშვილის არაბულ აფიორასთან! ამიტომ, დაუყოვნებლივ უნდა გასაჯაროვდეს არაბებთან დადებული ხელშეკრულება!

პირდაპირ ვამბობ, ეს პროექტი ასეთი სახით ეწინააღმდეგება საქართველოს ეროვნული

უსაფრთხოების ინტერესებს!

ეს დანაშაულია!", — წერს მამუკა ხაზარაძე.

ოცნების ხელისუფლების ეკონომიკისა და მდგრადი განვითარების მინისტრმა, მარიამ ქვრივიშვილმა და კომპანია "იგლ ჰილსის" დამფუძნებელმა, მოჰამედ ალი ალაბარმა 22 ოქტომბერს ხელი მოაწერეს საინვესტიციო შეთანხმებასა და საერთო კომპანიის ჩამოყალიბების შესახებ ხელშეკრულებას, რომელთა ფარგლებშიც "იგლ ჰილსი" თბილისსა და გონიოში დეველოპერულ პროექტებს განახორციელებს. მარიამ ქვრივიშვილის შეფასებით, მნიშვნელოვანია, რომ შეთანხმების თანახმად, საქართველო პროექტების პარტნიორად და კომპანიის 33%-იანი წილის თანამესაკუთრედ განისაზღვრა.

რამდენიმე დღის წინ, Emaar ჯგუფის და Eagle Hills-ის დამფუძნებელმა და მმართველმა დირექტორმა, მოჰამედ ალაბარმა საქართველოში დაგეგმილი პროექტების შესახებ სოციალურ ქსელში ვიდეორგოლი გამოაქვეყნა.

"საქართველოს გულიდან შავი ზღვის სანაპირომდე. Tbilisi Waterfront და
Gonio Yachts & Marina Eagle Hills Georgia-სგან, სადაც თანამედროვე ცხოვრება ხვდება მარადიულ სილამაზეს", — წერს არაბი ინვესტორი, რომელმაც საქართველოში დეველოპერულ პროექტებზე 6.5 მლრდ-იანი ინვესტიცია უნდა განახორციელოს.

მიმდინარე წლის იანვარში ოცნების ხელისუფლების მთავრობის ადმინისტრაციამ გაავრცელა ინფორმაცია იმის შესახებ, რომ დეველოპერული კომპანია Emaar Properties/Eagle Hills-ი საქართველოში 6 მილიარდი აშშ დოლარის მოცულობის ინვესტიციას განახორციელებდა. თანამშრომლობის მემორანდუმი კომპანიასა და ქართულ მხარეს შორის აბუ-დაბიში ოცნების ხელისუფლების პრემიერმინისტრ ირაკლი კობახიძის ვიზიტის ფარგლებში გაფორმდა.