რუსეთის პრეზიდენტის, ვლადიმერ პუტინის ბრძანებით, რომელიც 22 ოქტომბრითაა დათარიღებული, დსთ-ს ქვეყნებთან, საქართველოსთან და მის ოკუპირებულ ტერიტორიებთან რუსეთის სახელმწიფო საზღვრების დელიმიტაციისა და დემარკაციის საკითხებში ელჩად ნიკოლაი უდოვიჩენკო დაინიშნა.

როგორც რუსული მედია წერს, რომ "პუტინმა დსთ-ს ქვეყნებთან საზღვრების საკითხებში ახალი სპეციალური წარმომადგენელი დანიშნა. საგარეო საქმეთა სამინისტროს ყოფილი სპეციალური ელჩი, უდოვიჩენკო, დსთ-ს ქვეყნებთან, საქართველოსთან, აფხაზეთთან და სამხრეთ ოსეთთან საზღვრების საკითხებში სპეციალურ წარმომადგენლად დაინიშნა. ის ასევე ხელმძღვანელობს რუსეთის დელეგაციას კასპიის ზღვის შესახებ მრავალმხრივ მოლაპარაკებებში".

"რუსეთის ფედერაციის საგარეო საქმეთა სამინისტროს საგანგებო დავალებათა ელჩი, ნიკოლაი ნიკოლაევიჩ უდოვიჩენკო, დაინიშნოს რუსეთის ფედერაციის პრეზიდენტის სპეციალურ წარმომადგენლად რუსეთის ფედერაციის სახელმწიფო საზღვრის დელიმიტაციისა და დემარკაციის საკითხებში მოსაზღვრე სახელმწიფოებთან - დამოუკიდებელ სახელმწიფოთა თანამეგობრობის წევრებთან და ასევე დაევალოს მას რუსეთის ფედერაციის სახელმწიფო საზღვრის დელიმიტაციისა და დემარკაციის პასუხისმგებლობა აფხაზეთის რესპუბლიკასთან, საქართველოსთან და სამხრეთ ოსეთის რესპუბლიკასთან", — ნათქვამია ბრძანებულებაში.

უდოვიჩენკო ასევე დაინიშნა რუსეთის დელეგაციის ხელმძღვანელად კასპიის ზღვის შესახებ მრავალმხრივ მოლაპარაკებებში.

გასული წლის ივნისამდე 63 წლის უდოვიჩენკო რუსეთის ელჩი იყო ყირგიზეთში. ის ამ თანამდებობას 2019 წლიდან იკავებდა, მანამდე კი ნიგერიაში რუსეთის დიპლომატიური მისიის ხელმძღვანელი იყო. 2004 წლიდან 2013 წლამდე მუშაობდა საგარეო საქმეთა სამინისტროს დსთ-ს ქვეყნების მეორე დეპარტამენტში.

როგორც დოკუმენტშია მითითებული ბრძანება ძალაში შედის ხელმოწერისთანავე.