რუსეთი საქართველოს მოქალაქეებს რუსეთის ფედერაციაში სამხედრო სამსახურის კონტრაქტის ხელმოწერას და უკრაინის წინააღმდეგ ომში მონაწილეობას სთავაზობენ. ამის შესახებ ინფორმაცია ორგანიზაცია "სილა როდინა" (სამშობლოს ძალა) ვებსაიტზე გამოქვეყნდა.

პორტალზე ნათქვამია, რომ უცხო ქვეყნის მოქალაქეებს სთავაზობენ თავდაცვის სამინისტროსთან ოფიციალური კონტრაქტის ხელმოწერას, რომლის შემდეგაც მიიღებენ:

  • ერთჯერადად 2 500 000 რუბლს (დაახლოებით 75 000 ლარი);
  • დაჩქარებული რუსეთის მოქალაქეობის მიღებას,
  • ყოველთვიური ხელფასს, 210 000 რუბლის (დაახლოებით 6 300 ლარი) ოდენობით“.

როგორც "ეხო კავკაზა" წერს, ექსპერტები პროექტს უსაფრთხოების სამსახურებისთვის რეკრუტირების, პროპაგანდისა და სადაზვერვო ინფორმაციის შეგროვების შესაძლო კომბინაციად მიიჩნევენ.

ვებსაიტი "სილა როდინა" თავს საკონტრაქტო სამსახურის ცენტრად წარმოაჩენს და უკრაინის წინააღმდეგ ომისთვის ჯარისკაცებს ამზადებს. ცენტრი მსურველებს რუსეთის თავდაცვის სამინისტროში "ოფიციალურ" დასაქმებას ჰპირდება.

"საქართველო უძველესი დროიდან ცნობილია თავისი მამაცი მეომრებითა და სამხედრო ტრადიციებით. დღეს ამ ქვეყნის მოქალაქეებს აქვთ შესაძლებლობა, გააგრძელონ ეს დიდებული ისტორია მნიშვნელოვან მისიაში საკუთარი თავის დამტკიცებით. კონტრაქტი არ არის მხოლოდ სამსახური, არამედ პატივი, მოვალეობა და შანსი, შეცვალოთ თქვენი ცხოვრება უკეთესობისკენ", — ნათქვამია ვებსაიტზე.

საქართველოს გარდა, "სამშობლოს ძალა" სამხედრო სამსახურში იწვევს დსთ-ს ქვეყნების: სომხეთის, ბელარუსის, ყაზახეთის, ყირგიზეთი, ასევე თვითგამოცხადებული რესპუბლიკების - აფხაზეთის და სამხრეთ ოსეთის მოქალაქეებს.

ვებსაიტზე არ არის ზუსტი ინფორმაცია კომპანიის, მისი შემადგენლობის ან თავდაცვის სამინისტროს მიერ აკრედიტაციის შესახებ:

"ჩვენი კომპანია სპეციალიზებულია რუსეთის შეიარაღებულ ძალებში კონტრაქტით სამხედრო სამსახურისთვის კანდიდატების მოზიდვაში. ჩვენ ვთანამშრომლობთ რუსეთის 12-ზე მეტ მსხვილ ქალაქთან და ვეხმარებით მსურველებს საუკეთესო ვაკანსიების პოვნაში პრიორიტეტების მიხედვით", — წერია ვებგვერდზე.

ქართული პრორუსული პარტიის "სოლიდარობა მშვიდობისთვის" ლიდერმა, მამუკა ფიფიამ, "ეხო კავკაზასთან" ინტერვიუში ვარაუდობს, რომ ვებსაიტი შესაძლოა თავად რუსეთის თავდაცვის სამინისტროს მიერ იყოს შექმნილი.