ირანთან გაფორმებული საერთაშორისო შეთანხმება, რომელიც ატომური იარაღის გავრცელების შეჩერებასა და მსოფლიოს უსაფრთხოების დაცვას ისახავდა მიზნად, ოფიციალურად დასრულდა — თეირანმა ათწლიანი შეთანხმების შეწყვეტა გამოაცხადა. ინფორმაციას ამის შესახებ The Guardian ავრცელებს.

ირანის საგარეო საქმეთა სამინისტრომ განაცხადა, რომ ქვეყანა აღარ არის ვალდებული დაიცვას 2015 წლის შეთანხმება, რომელიც ოფიციალურად ცნობილია, როგორც "საერთო ყოვლისმომცველი სამოქმედო გეგმა" (JCPOA). ამ შეთანხმების ფარგლებში ირანს საერთაშორისო სანქციები მოეხსნა, სანაცვლოდ კი მან თავის ბირთვულ პროგრამაზე შეზღუდვები დააწესა.

"ამიერიდან 2015 წლის შეთანხმების ყველა დებულება, მათ შორის ბირთვულ პროგრამასთან დაკავშირებული შეზღუდვები და შესაბამისი მექანიზმები, ჩაითვლება დასრულებულად," — ნათქვამია სამინისტროს განცხადებაში.

თუმცა თეირანი ამავე დროს აღნიშნავს, რომ ქვეყანა "დიპლომატიისადმი მტკიცედ ერთგულია".

შეთანხმება 2015 წელს ვენაში ირანსა და "ექვსეულს" შორის — ჩინეთი, დიდი ბრიტანეთი, საფრანგეთი, გერმანია, რუსეთი და აშშ გაფორმდა. შეთანხმების მიზანი მრავალწლიანი დიპლომატიური დაძაბულობის დასრულება და ირანსა და დასავლეთს შორის ახალი ურთიერთობების ეპოქის დაწყება იყო.