საქართველოს ტექნიკური უნივერსიტეტის რექტორმა, დავით გურგენიძემ "საქართველოს უნივერსიტეტის" წინააღმდეგ პროკურატურას მიმართა. გურგენიძის მტკიცებით, ტექნიკური უნივერსიტეტის ტერიტორია მიხეილ სააკაშვილის დედაზე, გიული ალასანიაზე "ერთ ლარად გასხვისდა". რექტორის მოთხოვნაა ტექნიკურ უნივერსიტეტს ტერიტორია დაუბრუნდეს და "საქართველოს უნივერსიტეტს" ქონება დაუყადაღონ.

"არის იმის ეჭვი, რომ, სავარაუდოდ, იქ იყო სისხლის სამართლის დანაშაული. ამიტომ, ჩვენმა უნივერსიტეტმა, პირადად მე, უნივერსიტეტის კანცლერმა და კოლეგიალურმა ორგანოებმა, აკადემიურმა საბჭომ, წარმომადგენლობითმა საბჭომ ვიმსჯელეთ და გადავწყვიტეთ, რომ მიგვემართა საქართველოს გენერალური პროკურატურისთვის.

საქართველოს ტექნიკურ უნივერსიტეტს არცერთი კაპიკი არ მიუღია. მან საქართველოს ბიუჯეტში გადაიხადა თუ არა, ეს უკვე გენერალური პროკურატურის მოკვლევის საგანია. [...]

ჩვენ ვთვლით, რომ ეს უნდა დაუბრუნდეს ახალგაზრდობას და პროფესორ-მასწავლებლებს. ეს იყო საქართველოს ტექნიკური უნივერსიტეტის ქონება და კვლავ უნდა იყოს საქართველოს ტექნიკური უნივერსიტეტის. ჩვენ ვითხოვთ, რომ ეს ქონება აუცილებლად იყოს დაყადაღებული, ასევე ვითხოვთ, რომ ეს ქონება უნდა იყოს დაბრუნებული ტექნიკური უნივერსიტეტისათვის. ასევე, ვითხოვთ, რომ ის მიღებული მოგება, რომელიც უნივერსიტეტმა მრავალი წლის განმავლობაში ვერ მიიღო, დაინიშნოს ექსპერტიზა და დაუბრუნდეს უნივერსიტეტს, ახალგაზრდობას და პროფესორ-მასწავლებლებს," — განაცხადა გურგენიძემ.

აღნიშნულ საქმესთან დაკავშირებით ოცნების პრემიერმაც გააკეთა კომენტარი. კობახიძის თქმით, "ამ საკითხის შესწავლა საინტერესო იქნება" და დასძინა, რომ პრეზიდენტის ოჯახის წევრისთვის ინფრასტრუქტურის გადაცემა "ღია თავხედობაა".

"საქართველოს ტექნიკური უნივერსიტეტის კონკრეტული ინფრასტრუქტურა გადაეცა ერთ ლარად პრეზიდენტის ოჯახის წევრს, რაც არის ღია თავხედობა, ყველაფერს რომ თავი დავანებოთ. საინტერესო იქნება ამ საკითხის შესწავლა, დანარჩენი დაველოდოთ შესაბამისი უწყებების პასუხს," — განაცხადა კობახიძემ.

10 აპრილს, ტექნიკური უნივერსიტეტის რექტორი დავით გურგენიძე "ნაციონალური მოძრაობის დროებით საგამოძიებო კომისიაზე" იმყოფებოდა, სადაც აღნიშნულ თემაზე ისაუბრა. გურგენიძის თქმით, "უნივერსიტეტის ტერიტორიის მიტაცება 2006 წელს დაიწყო და 2008 წელს ქონების უკანონო ჩამორთმევით" დამთავრდა. რექტორი იხსენებს, რომ ამ პერიოდში უნივერსიტეტში კონტროლის პალატა შევიდა და არასაკმარისი ფართების გამო, ავტორიზაცია შეუჩერდა.

"მთელი სახელმწიფო აპარატი ერთვება უნივერსიტეტიდან ქონების წაღებაში. ცენტრის ბაზაზე ყალიბდება შპს საქართველოს უნივერსიტეტი. რაც შეეხება ქონებას, მთელი ქონება, მთავრობის ერთი გადაწყვეტილებით, უნივერსიტეტს ჩამოერთვა," — თქვა დავით გურგენიძემ.