ქართული ოცნების პარლამენტმა დაჩქარებული წესით მიიღო კანონი კონკრეტული პირებისთვის პარტიული და პოლიტიკური საქმიანობის აკრძალვის შესახებ.

"ოცნების" ხელისუფლების პარლამენტის იურიდიულ საკითხთა კომიტეტის თავმჯდომარის, არჩილ გორდულაძის თქმით, ცვლილებათა პაკეტში, რომელიც კონკრეტული პირებისთვის პარტიული საქმიანობის, პოლიტიკური თანამდებობის დაკავების უფლებისა და არჩევნებში მონაწილეობის აკრძალვას ითვალისწინებს, შესულია იმ პირების საქმიანობის აკრძალვაც, რომლებიც, შესაძლოა, არ არიან რომელიმე პარტიის წევრი, "მაგრამ საქმიანობით სრულად თანხვედრაში იყვნენ პარტიის მიზანთან ან პარტიის პოლიტიკის პრაქტიკაში გატარებას უზრუნველყოფდნენ".

"პარტია არ რის მხოლოდ სარეგისტრაციო ნომერი, ან პარტია არ არის მხოლოდ ის შენობა-ნაგებობა სადაც სათავო ოფისია განთავსებული. მაგალითისთვის "ნაციონალურ მოძრაობას" საკუთარი ოფისი საერთოდ არ გააჩნია. როგორც ვრცელდება ინფორმაცია, გაყიდეს კიდეც, ფინანსური კრიზისიდან გამომდინარე შავ ფულს ვეღარ ატრიალებენ მარტივად. თუ კონკრეტული პარტია აიკრძალება, მის წევრებს და მასთან დაკავშირებულ პირებს არ ექნებათ შესაძლებლობა პასიური საარჩევნო უფლებით ისარგებლონ. ანუ მათ აღარ შეეძლებათ იყვნენ არჩეული საქართველოს პარლამენტში, მუნიციპალიტეტებში. 2003 წლიდან დღემდე კონკრეტული პარტიები, და რეალურად ერთი პარტია, სხვადასხვა სახელით, სხვადასხვა სიმბოლიკით, ფერების გამოყენებით, მაგრამ მიზნობრივად ერთნი არიან. არ არსებობს კონსტიტუციაში მითითებული პარტიის აკრძალვის საფუძველი, რომელიც ამ პარტიებს დარღვეული არ ჰქონდეთ. მხოლოდ 4 ოქტომბრის მოვლენებია საკმარისი, იმისთვის, რომ კონკრეტული პარტიების აკრძალვის საფუძველი არსებობდეს.

…საბოლოო გადაწყვეტილება უნდა მიიღოს საკონსტიტუციო სასამართლომ კონკრეტულად მოსარჩელის მიერ წარდგენილი მტკიცებულების საფუძველზე. ამავე დროს მეორე მხარესაც ექნება შესაძლებლობა რომ საკუთარი შესაძლებლობა, რომ საკუთარი უფლებები დაიცვან", — განაცხადა გორდულაძემ.

ოცნების პრემიერმა, ირაკლი კობახიძემ 15 ოქტომბერს "პირველი არხის" ეთერში განაცხადა, რომ პარტიების ჩამონათვალი, რომელთა აკრძალვაც საკონსტიტუციო სასამართლოს ძალით სურთ, მცირე პარტიების ჩათვლით, შეიძლება ათამდე იყოს.

ასაკრძალი პარტიების სიის შედგენის პრინციპი, მისი თქმით, ასეთია: პირველი — "პარტია შედგება იმ ადამიანებისგან, რომლებიც წარმოადგენდნენ სისხლიან რეჟიმს. აქ იგულისხმება "ნაცმოძრაობა", "ახალი" და რამდენიმე მცირე პარტია". მეორე კრიტერიუმია — "ვინც ამ სისხლიან პარტიასთან ერთად ჩართული იყო სახელმწიფოს წინააღმდეგ საბოტაჟში".

რაც შეეხება ოპოზიციური პოლიტიკოსების სიას, რომელთა აკრძალვასაც "ქართული ოცნება" აპირებს, კობახიძემ განაცხადა, რომ "სია რამდენიმე დღეში გახდება ცნობილი, როდესაც სარჩელი ოფიციალურად შევა საკონსტიტუციო სასამართლოში".

ასევე იხილეთ: