ქართულმა ოცნების პარლამენტის ვებგვერდზე 2026 წლის ბიუჯეტის პროექტი გამოქვეყნდა, რომლის მიხედვითაც პენსიები და შშმ პირების სოციალური დახმარება იზრდება. მომავალი წლიდან იზრდება სახელმწიფო მოხელეებისა და მოსამართლეების ხელფასებიც.

"საქართველოს 2026 წლის სახელმწიფო ბიუჯეტის შესახებ" კანონპროექტის განმარტებით ბარათში ვკითხულობთ:

  • 70 წლის და მეტი ასაკის პენსიონერთა პენსია იზრდება 45 ლარით და განისაზღვრება 495 ლარის ოდენობით.
  • 70 წლამდე პირთა პენსია იზრდება 20 ლარით და განისაზღვრება 370 ლარის ოდენობით.
  • მაღალმთიან დასახლებებში 70 წლამდე პენსიონერთა პენსია 444 ლარი იქნება.
  • მაღალმთიან დასახლებებში 70 წლის და მეტი ასაკის პენსიონერთა პენსია 594 ლარს გაუტოლდება.
  • 18 წლამდე შშმ პირების სოციალური დახმარება 45 ლარით გაიზრდება.
  • დანარჩენი კატეგორიის შშმ პირების სოციალური დახმარება 20 ლარით გაიზრდება.
  • გათვალისწინებულია 120 ათას სოციალურ სარეიტინგო ქულამდე მყოფი ოჯახების 16 წლამდე ბავშვების
    ყოველთვიური 200-ლარიანი დახმარების დაფინანსება.

კანონპროექტის განმარტებით ბარათში ასევე წერია, რომ ჯანდაცვის პროგრამების დასაფინანსებლად გამოყოფილი იქნება 2,1 მილიარდ ლარზე მეტი — მათ შორის გათვალისწინებულია პირველადი ჯანდაცვის პერსონალის ხელფასების 10%- იანი ზრდა. ხოლო დევნილთა სახლებით უზრუნველყოფის მიზნით გათვალისწინებულია 240,0 მლნ ლარი.

რამდენით გაიზარდა ხელისუფლების წარმომადგენლებისა და მოსამართლეების ხელფასები?

საქართველოს კანონის მიხედვით "საჯარო დაწესებულებაში შრომის ანაზღაურების შესახებ" სახელმწიფო-პოლიტიკური თანამდებობის პირის (გარდა საქართველოს პარლამენტის წევრისა) თანამდებობრივი სარგო კოეფიციენტების სისტემით გამოითვლება: თანამდებობრივი სარგოს კოეფიციენტი მრავლდება საბაზო თანამდებობრივ სარგოზე.

2025 წლის ბიუჯეტში საბაზისო ხელფასი 1 460 ლარი იყო, ხოლო 2026 წლის საბიუჯეტო გეგმით 1 600 ლარი ხდება.

მაგალითად პრეზიდენტს, პრემიერმინისტრს, პარლამენტის თავმჯდომარეს 2025 წელს 14 600 ლარი ჰქონდათ ხელფასი (საბაზისო ხელფასი გამრავლებული კოეფიციენტზე (10). 2026-ში მათ ხელფასი 1400 ლარით ეზრდებათ და 16 000 ლარი ხდება.

ამ პრინციპით ხელფასების ზრდა ასე მოხდება:

  • პარლამენტის თავმჯდომარის მოადგილის ხელფასი 1 260 ლარით იზრდება და 14 400 ლარი ხდება.
  • მინისტრების, პარლამენტის ფრაქციების თავმჯდომარეების ხელფასი 1190 ლარით იზრდება და 13 600 ლარი ხდება.
  • პარლამენტის დეპუტატების ხელფასი 1120 ლარით იზრდება და 12 800 ლარი ხდება.

ამავე პრინციპით იზრდება მოსამართლეების ხელფასებიც. უზენაესი სასამართლოს თავმჯდომარის ხელფასიც პრეზიდენტის და პრემიერმინისტრს მსგავსად 1400 ლარით იზრდება და 16 000 ლარი გახდება.

  • უზენაესის თავმჯდომარის პირველი მოადგილის ხელფასი 1288 ლარით გაიზრდება და 14 720 ლარი გახდება;
  • უზენაესის მოსამართლეების ხელფასი 1190 ლარით იზრდება და 13 600 ლარი ხდება.
    სააპელაციო სასამართლოს თავმჯდომარის ხელფასი 1 176 ლარით იზრდება და 13 440 ლარი ხდება.