გიორგი ბაჩიაშვილის ადვოკატმა, ლევან მახარაშვილმა პენიტენციური დეპარტამენტის ხელმძღვანელის ყოფილი მოადგილის, გიორგი ქემოკლიძის დაკავებაზე მედიასთან ისაუბრა. ადვოკატის განმარტებით, სუს-ის ბრალდება აღნიშნულ პირზე აბსურდულია, რადგან გიორგი ბაჩიაშვილი მას არ იცნობდა და მისი არსებობის შესახებ სიუჟეტიდან შეიტყო.

"გიორგი ბაჩიაშვილი აცხადებს, რომ აღნიშნული ბრალდება არის აბსურდული. მან დაკავებული პირის სახელი და გვარი შეიტყო მხოლოდ სიუჟეტიდან და მანამდე არც იცოდა მისი არსებობის შესახებ.

...პირველივე დღიდან ვაცხადებდით, რომ სასიცოცხლოდ მნიშვნელოვანი იყო ვიდეოჩანაწერების ამოღება, დღეს აღმოჩნდა, რომ ეს ვიდეოჩანაწერები არის წაშლილი. ასევე, პირველივე დღიდან ვითხოვდით, რომ ბაჩიაშვილი მოთავსებულიყო განცალკევებით საკანში, სხვა მსჯავრდებულებისგან დამოუკიდებლად, ვინაიდან თეორიულად, შესაძლოა, ყოფილიყო მსგავსი საფრთხეები. ესეც არ დაკმაყოფილდა.
თუკი არსებობდა რამე ოპერატიული ინფორმაცია, ცხადია, ამ ყველაფრის პრევენცია შესაძლებელი იყო სწორედ ბაჩიაშვილის განმარტოებით მოთავსებით.

...ასევე ერთ-ერთი არგუმენტი იყო, რომ თითქოსდა ბაჩიაშვილის მიერ მოხდა ორი თანასაკნელის ვინაობის დაგეგმვა. ბაჩიაშვილი აცხადებს, რომ წარმოუდგენელია მისთვის, როგორ უნდა დაეგეგმა, ვის შეუსახლებდნენ... 11 ივნისამდე ბაჩიაშვილი იმყოფებოდა საკანში მარტო.

მსგავს ბრალდებას სჭირდება მტკიცებულებების წარმოდგენა, წარმოუდგენლად მიმაჩნია მტკიცებულებების არსებობა," — განაცხადა ლევან მახარაშვილმა.

11 ივლისს ციხეში ბაჩიაშვილზე თავდასხმის შემდეგ, 21 აგვისტოს, სასჯელაღსრულების გლდანის #8 დაწესებულების ყოფილმა დირექტორმა დავით გოგობერიშვილმა და მისმა მოადგილემ, გიორგი ქემოკლიძემ თანამდებობები დატოვეს.

"დისციპლინური წარმოების ფარგლებში გამოვლენილი გარემოებების შესწავლისა და იმ გარემოების გათვალისწინებით, რომ მიმდინარე გამოძიებისა და შიდასამსახურებრივი შემოწმების პირობებში, ხელმძღვანელი პირები კვლავაც ინარჩუნებდნენ თანამდებობებს, რასაც შესაძლოა ხელი შეეშალა საქმეზე ობიექტური ჭეშმარიტების დადგენაში, N8 პენიტენციური დაწესებულების ხელმძღვანელმა, დ. გოგობერიშვილმა და სპეციალური პენიტენციური სამსახურის პენიტენციური დეპარტამენტის დირექტორის მოადგილემ, გ. ქემოკლიძემ თანამდებობები დატოვეს", – ეწერა სპეციალური პენიტენციური სამსახურის განცხადებაში, რომელიც 21 აგვისტოს გავრცელდა.

9 ოქტომბერს დავით გოგიბერაშვილი გარდაცვლილი იპოვეს, ხოლო მეორე დღის მისი მოადგილე დააკავეს. სუს-ის განცხადებით, ქემოკლიძე ბაჩიაშვილს თავდასხმის "გათამაშებაში" დაეხმარა.