შინაგან საქმეთა სამინისტროს ინფორმაციით, დააკავეს 2 პირი, რომლებიც პოლონეთის 3 მოქალაქეს ფიზიკურად გაუსწორდა. უწყების ინფორმაციით, ფიზიკური დაპირისპირებისას ერთ-ერთმა ბრალდებულმა ბლაგვი საგნის გამოყენებით ფიზიკურად იძალადა პოლონეთის მოქალაქეებზე. მომხდარზე გამოძიება სისხლის სამართლის კოდექსის 126-ე მუხლის პირველი პრიმა ნაწილით მიმდინარეობს.

"გამოძიებით დადგინდა, რომ ბრალდებულებმა, ურთიერთშელაპარაკების ნიადაგზე, თბილისში მდებარე ერთ-ერთი რესტორნის მიმდებარე ტერიტორიაზე, სხვადასხვა სახის დაზიანებები მიაყენეს პოლონეთის სამ მოქალაქეს, ხოლო ფიზიკური დაპირისპირებისას ერთ-ერთმა ბრალდებულმა, ე.გ-მ ბლაგვი საგნის გამოყენებით ფიზიკურად იძალადა მათზე.
მომხდარის შემდეგ, დანაშაულში ბრალდებული პირები შემთხვევის ადგილიდან მიიმალნენ.
დაშავებული უცხო ქვეყნის მოქალაქეები შესაბამისი სამედიცინო დახმარების გაწევის მიზნით კლინიკაში გადაიყვანეს. ჩატარებული ოპერატიული ღონისძიებებისა და საგამოძიებო მოქმედებების შედეგად, სამართალდამცველებმა ე.გ. და ს.ჯ. ცხელ კვალზე დააკავეს," — წერს უწყება.

მომხდარს პოლონური მედიაც ეხმაურება. RMF 24-ს ცნობით, 2 პოლონელ სასაზღვრო ოფიცერს საქართველოს მოქალაქეები დანითა და ხელკეტით დაესხნენ თავს, რის შემდეგაც მათ ჰოსპიტალიზაცია დასჭირდათ — ერთ-ერთ ოფიცერს თავის არეში მძიმე ჭრილობა ჰქონდა მიყენებული.

პოლონეთის შინაგან საქმეთა მინისტრის, მარცინ კერვინსკის განცხადებით ოფიცრები საქართველოში მისიით იმყოფებოდნენ, რომლის ფარგლებში პოლონეთიდან უცხო ქვეყნის 19 მოქალაქე, მათ შორის — 10 ქართველი და 9 პაკისტანელი გაიყვანეს.