უკრაინის თავდაცვის მინისტრის, დენის შმიჰალის განცხადებით უკრაინა სლოვაკეთისგან რობერტ ფიცოს პრემიერობის პერიოდში პირველად მიიღებს დახმარებას, რაც მოიცავს საინჟინრო და სამშენებლო ტექნიკას, სატრანსპორტო საშუალებებს, ნაღმის გამანეიტრალებელ სისტემებსა და სამედიცინო ევაკუაციის მანქანებს.

რუსეთის სრულმასშტაბიანი შეჭრის დაწყებიდან, 2022 წლის 24 თებერვლიდან, ფიცოს ხელისუფლებაში დაბრუნებამდე, 2023 წლის ოქტომბრამდე — სლოვაკეთმა უკრაინას 13 სამხედრო დახმარების პაკეტით მიაწოდა, რომლის საერთო ღირებულება დაახლოებით 800 მილიონ დოლარს შეადგენდა.

რობერტ ფიცომ გააუქმა დაგეგმილი დახმარების მე-14 პაკეტი, რომლის ღირებულებაც 45 მილიონი დოლარი იყო და რომელიც მოიცავდა საჰაერო თავდაცვის სისტემებისთვის 140 რაკეტას, 5 000-ზე მეტ საარტილერიო ჭურვს და 4 მილიონ ტყვიას.

შმიჰალმა მადლობა გადაუხადა სლოვაკეთს მხარდაჭერის განახლებისთვის და აღნიშნა, რომ მხარეებმა ასევე განიხილეს უკრაინულ და სლოვაკურ თავდაცვის კომპანიებს შორის თანამშრომლობა და დასძინა, რომ სლოვაკეთი ახალ, მე-15 დახმარების პაკეტზეც მუშაობს.

5 სექტემბერს, უკრაინის პრეზიდენტი ვოლოდიმირ ზელენსკი რობერტ ფიცოს უშგოროდში შეხვდა. ზელენსკიმ შეხვედრის შემდეგ განაცხადა, რომ "შინაარსიანი" დიალოგი შედგა მხარეებს შორის.