"ძალიან გაგვიჭირდება დავადასტუროთ ის, რომ დაჭერილი ადამიანები პოლიტპატიმრები არიან", — ამის შესახებ ოპოზიციონერმა დიმიტრი ცქვიტიშვილმა 4 ოქტომბრის აქციის საორგანიზაციო კომიტეტის წევრების დაკავებაზე საუბრისას "პალიტრანიუსის" ეთერში განაცხადა.

"პრეზიდენტის სასახლეში შეჭრა გარკვეულ ლეგიტიმაციას აძლევთ, რომ ძალადობრივად იმოქმედონ და ვიღაცები დაიჭირონ. ეს ლეგიტიმაცია მოიპოვეს, ამ პროვოკაციაზე წამოეგნენ. ძალიან გაგვიჭირდება დავადასტუროთ ის, რომ გუშინ დაჭერილი ადამიანები პოლიტპატიმრები არიან. ამის ლეგიტიმური საფუძველი შექმნეს თვითონვე მათი დაპატიმრებით. დღემდე არ გაუკეთებიათ საერთაშორისო ორგანიზაციებს განცხადება იმასთან დაკავშირებით, რომ გუშინ დაკავებულები პოლიტპატიმრები არიან", — თქვა ცქიტიშვილმა.

მისი თქმით, "დღეს საპროტესტო მხარეს არის უფრო კრიზისი, ყველამ საკუთარ თავზე უნდა აიღოს საკუთარი ბრალეულობა და პასუხისმგებლობა და ამის შედეგ ვიფიქროთ შემდგომ ნაბიჯებზე".

"შეთანხმება უნდა მომხდარიყო. ეს არის კავკასიური ცარცის წრე — ვისაც სამშობლო უყვარს, იმან დათმოს. არავინ დათმო და მივიღეთ ეს შედეგი. დღეს საპროტესტო მხარეს არის უფრო კრიზისი. პირველ რიგში ყველამ აიღოს საკუთარ თავზე საკუთარი ბრალეულობა და პასუხისმგებლობა და ამის შედეგ ვიფიქროთ შემდგომ ნაბიჯებზე. აქციის მონაწილეებს შორის ბევრად უფრო მეტი პოლიტიკური კულტურის მაჩვენებელია, ვიდრე პოლიტიკურ პარტიებში. ეს დამანახა გუშინდელმა დღემ", — განაცხადა ცქიტიშვილმა.