"ლელო-ძლიერი საქართველოს" ერთ-ერთმა ლიდერმა, ბადრი ჯაფარიძემ, არჩევნებზე საკუთარი ხმა დააფიქსირა.იქ მყოფ ჟურნალისტებს მან განუცხადა, რომ ცვლილებებისთვის მოქალაქეთა აქტიურობაა აუცილებელი.

"მე ხმა მივეცი, რა თქმა უნდა, იმას, რომ ქართველმა ხალხმა დაიბრუნოს საკუთარ ხელში თავისი ქალაქის მმართველობა. ასე უნდა მოხდეს ყველგან. აუცილებელია ვიაქტიუროთ. აქტიურობის, არ დანებებისა და შეუპოვრობის გარეშე ცვლილებები არ მოვა. მინდა ყველას მოვუწოდო, რომ ყველაზე ეფექტური იარაღი, საკუთარი ხმა მისცეს იმას, რომ შევძლოთ იმ მიზნის აღსრულება, რომელიც ქართველ ხალხს სურს და ქვეყნის, ქალაქების, დასახლებული პუნქტების დაბრუნება", — თქვა მან.

ბადრი ჯაფარიძემ კომენტარი გააკეთა დარღვევებთან დაკავშირებითაც და აღნიშნა, რომ ყველა ასეთი ფაქტი უნდა აღირიცხოს.

"რაც შეეხება დარღვევებს, ყველა დარღვევა უნდა აღირიცხოს. ყველგან იწერება საჩივრები, იქნება მაქინაციების მცდელობა, ეს დამახასიათებელია დღევანდელი ხელისუფლებისთვის. ყველა ფაქტზე, რომელსაც ახლა ჩვენ ვაკვირდებით, აუცილებლად უნდა შედგეს შესაბამისი საჩივარი, ყველაფერი უნდა აღირიცხოს იმისთვის, რომ საზოგადოებამ იცოდეს რასთან გვაქვს საქმე. ჩვენი ვალდებულება უნდა შევასრულოთ და აღვრიცხოთ ყველა დარღვევის ფაქტი. რა თქმა უნდა, დიდი ილუზიები მათ გამოძიებაზე არ გვაქვს, მაგრამ ჩვენ ჩვენი ვალდებულება უნდა შევასრულოთ, საზოგადოებამ რომ იცოდეს, რასთან გვაქვს საქმე", — განაცხადა პოლიტიკოსმა.

4 ოქტომბრის თვითმმართველობის არჩევნებში მონაწილეობაზე უარს ამბობს 8 ოპოზიციური პარტია, მათ შორის ის 2 კოალიცია — ცვლილებისთვის და ნაციონალური მოძრაობა, რომლებმაც ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

ბოიკოტის რეჟიმში მყოფი ოპოზიციური პარტიები აცხადებენ, რომ არჩევნებში შესვლა ოცნებისთვის ლეგიტიმაციის მიცემას ნიშნავს და სასურველ ციფრებს ოცნება მაინც დაიწერს. თვითმმართველობის არჩევნების დღეს, 4 ოქტომბერს ოპოზიციური პარტიები და აქტივისტები რუსთაველზე აქციას გამართავენ. ორგანიზატორებს შორის არიან ნაციონალური მოძრაობის და მოძრაობა რუსთაველის გამზირის წარმომადგენლები. ისინი აცხადებენ, რომ ამ დღეს ოცნების ხელისუფლებას "მშვიდობიანად დაამხობენ"