დემოკრატიის კვლევის ინსტიტუტი (DRI) სახელმწიფო უსაფრთხოების სამსახურის ახალი უფროსის, მამუკა მდინარაძის მიერ 1-ელ ოქტომბერს ტელეკომპანია იმედთან გაკეთებულ განცხადებებს ეხმაურება. DRI მიერ გავრცელებულ განცხადებაში ნათქვამია, რომ “სუს-ი ფორმალურად დამოუკიდებელი სახელმწიფო ორგანოა, რომლის საქმიანობა პარტიული გავლენისგან და კონტროლისგან თავისუფალი უნდა იყოს. თუმცა სუს-ის უფროსის გზავნილები სრულ თანხვედრაშია ირაკლი კობახიძესა და „ქართული ოცნების“ სხვა წარმომადგენლების მუქარასთან“.

"სახელმწიფო უსაფრთხოების სამსახურის ახალმა უფროსმა მამუკა მდინარაძემ 1 ოქტომბერს ტელეკომპანია იმედთან მიცემულ ინტერვიუში არა ერთი მუქარის შემცველი განცხადება გააკეთა. სუს-ის ახალი უფროსის მუქარის ადრესატები აქციის მონაწილეები იყვნენ, რომელთაც "ძალიან მძიმე პასუხის" მიღებას დაჰპირდა, თუ ისინი კანონის ფარგლებიდან გასცდებიან. სუს-ი ფორმალურად დამოუკიდებელი სახელმწიფო ორგანოა, რომლის საქმიანობა პარტიული გავლენისგან და კონტროლისგან თავისუფალი უნდა იყოს. თუმცა სუს-ის უფროსის გზავნილები სრულ თანხვედრაშია ირაკლი კობახიძესა და ქართული ოცნების სხვა წარმომადგენლების მუქარასთან, რაც არ არის გასაკვირი, თუ გავითვალისწინებთ, ერთპარტიული პარლამენტის მიერ მდინარაძის კანდიდატურის ყოველგვარი განხილვის და დისკუსიის გარეშე დამტკიცებას", — ნათქვამია DRI-ის მიერ გავრცელებულ განცხადებაში.