მედიის, ინფორმაციის და სოციალური კვლევების ცენტრი (CMIS) საქართველოში დამოუკიდებელი მედიის წარმომადგენლების უფლებების დარღვევის შემთხვევების შესახებ ინფორმაციას ავრცელებს.

CMIS-მა ბოლო ერთი წლის განმავლობაში (2024 წლის ოქტომბრიდან 2025 წლის ოქტომბრამდე), საქართველოში, ჟურნალისტის, მედიასაშუალებებისა და მედიის უფლებებზე მომუშავე სამოქალაქო ორგანიზაციების წინააღმდეგ მომხდარი 434 ინციდენტი აღრიცხა.

CMIS საქართველოს მედიაგარემოზეც აკეთებს აქცენტს და ამბობს, რომ ის კრიტიკულ მდგომარეობაშია.

"საქართველოში მედიაგარემო კრიტიკულ მდგომარეობაშია. ბოლო ერთი წლის განმავლობაში, დამოუკიდებელი ჟურნალისტებისა და მედიების წინააღმდეგ განხორციელდა ისეთი ტიპის დარღვევები როგორებიცაა: ფიზიკური ძალადობა, უკანონო დაკავება/დაპატიმრება, დაკითხვა, გადაღების აკრძალვა, ადმინისტრაციულ შენობებში არშეშვება, უკანონო ჯარიმები, სიტყვიერი შეურაცხყოფა, მუქარა და სხვა. მიუხედავად ასეთი მასშტაბური პრობლემისა, არც ერთი თავდამსხმელი, მათ შორის, საჯაროდ იდენტიფიცირებული პირები, პასუხისგებაში მიცემულები არ არიან", — წერია CMIS-ის მიერ გავრცელებულ ინფორმაციაში.

CMIS აქცენტს აკეთებს "ბათუმელებისა" და "ნეტგაზეთის" დამფუძნებლის, მზია ამაღლობელის დაკავებასთან დაკავშირებით და აღნიშნავს იმასაც, რომ "პარალელურად, დამოუკიდებელი მედია და მედიის უფლებებზე მომუშავე სამოქალაქო სექტორის წარმომადგენლები, რეპრესიული კანონმდებლობის სამიზნე გახდნენ. ქართული ოცნების პარლამენტმა მიიღო არაერთი კანონი თუ ცვლილებები არსებულ კანონმდებლობაში, რომელიც ეგზისტენციალურ საფრთხეს წარმოადგენს დამოუკიდებელი მედიისა თუ სამოქალაქო სექტორისთვის."

CMIS-ის ცნობით, ბოლო ერთი წლის განმავლობაში დაფიქსირებულ დარღვევებს შორისაა:

პოლიტიკური მოტივით გასამართლება — 1 შემთხვევა;

ფიზიკური ძალადობა და დაზიანება — 122 შემთხვევა;

ჟურნალისტურ საქმიანობაში უკანონოდ ჩარევა — 104 შემთხვევა;

სამართლებრივი კატეგორიის ინციდენტები — 102 შემთხვევა;

სიტყვიერი შეურაცხყოფა, დაშინება და დისკრედიტაცია — 108 შემთხვევა;

საკუთრებაზე თავდასხმა — 29 შემთხვევა;

შრომითი უფლებები დარღვევის (2025 წლის იანვრიდან დღემდე) — 22 შემთხვევა.

CMIS- ის ცნობით, ჟურნალისტების მიმართ ჩადენილი დარღვევების რაოდენობა პროევროპული პროტესტის დაწყების შემდეგ გაიზარდა.

"ჟურნალისტების მიმართ ჩადენილი დარღვევების რაოდენობა განსაკუთრებით მაღალია პროევროპული პროტესტის დაწყების შემდეგ. მხოლოდ პროტესტის გაშუქებისას, 28 ნოემბრიდან მოყოლებული დღემდე, მედიის 181 წარმომადგენელი დაზარალდა", — წერს CMIS.