ევროპის საბჭოს მინისტრთა კომიტეტმა საქართველოდან წარდგენილი სტრასბურგის მოსამართელობის სამი კანდიდატიდან რეკომენდაცია ლადო ჭანტურიას გაუწია, რაც იმას ნიშნავს, რომ შესარჩევი კონკურსის მეორე ეტაპი დასრულდა.

საქართველოს იუსტიციის მინისტრის, თეა წულუკიანის თქმით, პროცედურა ამჯერადაც იყო შესაბამისი კონვენციის მოთხოვნებთან და კომიტეტმა მოიწონა ქვეყნიდან გაგზავნილი სამპირიანი სია:

"მიუხედავად ბევრი კრიტიკისა და სტრასბურგში საქართველოდან გაგზავნილი არაერთი კრიტიკული მოსაზრებისა, ფაქტი ფაქტად რჩება, რომ ქვეყნის შიგნით ჩატარებული პროცედურისადმი არ დასმულა არასდროს შეკითხვები."

თეა წულუკიანის ცნობით, დარჩენილია მესამე ეტაპი, სადაც სადაც საპარლამენტთაშორისო ასამბლეამ კენჭი უნდა უყაროს სამპირიან სიას და შეარჩიოს მათ შორის საუკეთესო კანდიდატი:

"მე იმედი მაქვს, რომ ასამბლეა კომიტეტის რეკომენდაციას გაითვალისწინებს."

ლადო ჭანტურია 1999-2004 წლებში იყო საქართველოს უზენაესი სასამართლოს თავმჯდომარე, მანამდე კი, 1998-1999 წლებში, საქართველოს იუსტიციის მინისტრის პოსტი ეკავა. ჭანტურია წლების განმავლობაში ეწეოდა აკადემიურ საქმიანობას გერმანიაში, 2004 წლიდან კი, ის საქართველოს ელჩია გერმანიაში.