მოლდოვაში საპარლამენტო არჩევნები დაიწყო, რომელსაც შესაძლოა ქვეყნის ევროპულ კავშირში გაწევრიანების გზაზე გადამწყვეტი გავლენა ჰქონდეს. ამის შესახებ ინფორმაციას Reuters ავრცელებს.

ევროკავშირში გაწევრიანების მსურველი მთავრობისთვის პარლამენტზე კონტროლი გრძელვადიანი საკანონმდებლო რეფორმების გასატარებლად სასიცოცხლოდ მნიშვნელოვანია. თუმცა ძალაუფლება ყოფილ საბჭოთა რესპუბლიკაში ათწლეულებია პროევროპულ და პრორუსულ ბლოკებს შორის მერყეობს. ქვეყნის დაახლოებით მესამედი — დნესტრის აღმოსავლეთით მდებარე დნესტრისპირეთი — პრორუსული სეპარატისტული ადმინისტრაციის მიერ კონტროლდება, სადაც მცირე ზომის რუსული სამხედრო კონტინგენტიც არის დისლოცირებული.

მოლდოვის ხელისუფლება მოსალოდნელ რუსულ ჩარევაზე საუბრობს. პრეზიდენტი მაია სანდუ არჩევნებს ქვეყნისთვის ეგზისტენციალურ გამოცდად მიიჩნევს და ამბობს, რომ რუსეთის მასშტაბური კამპანია ამომრჩევლის გადასაბირებლად პირდაპირ საფრთხეს უქმნის მოლდოვას.

"თუ რუსეთი მოლდოვაზე კონტროლს დაამყარებს, შედეგები მყისიერი და სახიფათო იქნება ჩვენი ქვეყნისა და მთელი რეგიონისთვის," — განაცხადა სანდუმ გასულ ორშაბათს.

გამოკითხვების მიხედვით მმართველმა "მოქმედებისა და სოლიდარობის პარტიამ" (PAS) შესაძლოა ვერ მოახერხოს უმრავლესობის შენარჩუნება.

ბოლო კვირებში ხელისუფლებამ ასობით რეიდი ჩაატარა უკანონო პარტიული დაფინანსებისა და რუსეთის მხარდაჭერით მოქმედი ქსელების წინააღმდეგ, რომლებიც არჩევნების წინ არეულობის მოწყობას ცდილობდნენ. 26 სექტემბერს საარჩევნო კომისიამ არჩევნებიდან უკანონო დაფინანსების ბრალდებით მოლდოვის გული, რომელიც პრორუსული პატრიოტთა ბლოკის ნაწილია მოხსნა.

მოსკოვი ჩარევას უარყოფს და აცხადებს, რომ PAS-ის მიერ კონტროლირებადი მთავრობა ანტირუსულ ისტერიკას ავრცელებს ხმების მოსაგროვებლად.