ტელეკომპანია იმედის ინფორმაციით, "იმედის კვირის" ჟურნალისტი და ოპერატორი მოლდოვაში საპარლამენტო არჩევნების გასაშუქებლად არ შეუშვეს. განცხადებაში ვკითხულობთ, რომ ჟურნალისტს და ოპერატორს "მიუჩინეს მეთვალყურეები და იმასაც არ ეუბნებიან, როდის მიეცემათ სამშობლოში დაბრუნების საშუალება".

იმედმა ბოლოს დასძინა, რომ "ასეთია დემოკრატია მოლდოვურად და ჟურნალისტურ საქმიანობაში ხელის შეშლის "ევროპული" სტანდარტი"

"ევროპულ დემოკრატიად შერაცხილ მოლდოვაში ჩასული "იმედის კვირა" პირდაპირ დსთ-ში აღმოჩნდა.

ჩვენი ჟურნალისტი და ოპერატორი კიშინეუში არჩევნების გასაშუქებლად არ შეუშვეს. აეროპორტში 5 საათიანი დაყოვნების შემდეგ, გადამღები ჯგუფი გამგზავრების დარბაზში გადაიყვანეს. მიუჩინეს მეთვალყურეები და იმასაც არ ეუბნებიან, როდის მიეცემათ სამშობლოში დაბრუნების საშუალება.

არ აძლევენ ტელეფონით სარგებლობის შესაძლებლობას, უზღუდავენ გადაადგილებას, ჩამორთმეული აქვთ პასპორტები და დოკუმენტაცია. ერთადერთი, რაც უთხრეს, არის ის, თითქოს მათ არ ჰქონდათ დადასტურებული საცხოვრებელი ადგილის, მატერიალური უზრუნველყოფისა და ქვეყანაში შესვლის მიზნის დამადასტურებელი დოკუმენტები, რაც სიცრუეა, რადგან "იმედის კვირის" ჟურნალისტებს ყველა საჭირო დოკუმენტი თან აქვთ.

მოლდოვაში კვირას საპარლამენტო არჩევნებია და სწორედ საარჩევნო პროცესის გადასაღებად გაემგზავრა "იმედის კვირა". ასეთია დემოკრატია მოლდოვურად და ჟურნალისტურ საქმიანობაში ხელის შეშლის "ევროპული" სტანდარტი," — ვკითხულობთ "იმედის კვირის" განცხადებაში.