რუსეთის წინააღმდეგ უკრაინაში მებრძოლი გიორგი კინოიანი სომხეთის რესპუბლიკის სისხლის სამართლის სააპელაციო სასამართლომ პატიმრობაში დატოვა.

25 სექტემბერს გიორგი კინოიანის სააპელაციო საქმის განხილვა მის გარეშე ჩატარდა. სასამართლომ არ დააკმაყოფილა ჩვენი მოთხოვნა, რომ გიორგი გათავისუფლებულიყო უკანონო პატიმრობიდან, რომელშიც უკვე 23-ე დღეა იმყოფება.

"ამ ეტაპზე ერთადერთი გზა ლოდინია — ველოდებით ადამიანის უფლებათა ევროპული სასამართლოს დაჩქარებულ გადაწყვეტილებას გიორგის გათავისუფლების შესახებ.

ამავდროულად, საქმის გასაჩივრებას ვგეგმავთ საკასაციო სასამართლოშიც, რათა დავამტკიცოთ, რომ თვითაღიარებული რესპუბლიკის მიერ მიღებული გადაწყვეტილება და გიორგის დაკავება უკანონოა", — წერია გიორგი კინიოანის სოციალურ ქსელში გავრცელებულ ინფორმაციაში.

კინოიანი უკრაინაში ომის დაწყების პირველ ეტაპზე იმყოფებოდა. 2024 წლის 25 ოქტომბერს რუსეთის მიერ ოკუპირებული დონეცკის ოლქის ე.წ. სასამართლომ დაუსწრებლად გაასამართლა, დამნაშავედ ცნო და შვიდი წლით თავისუფლების აღკვეთა მიუსაჯა.

გიორგი კინოიანი 3 სექტემბერს სომხეთ-საქართველოს საზღვარზე დააკავეს. სომხეთის სასამართლომ მას 40-დღიანი საექსტრადიციო პატიმრობა მიუსაჯა.

9 სექტმებრს 6-მა ევროპელმა პარლამენტარმა წერილი გაავრცელა, სადაც ნათქვამი იყო, რომ გიორგი კინოიანის ექსტრადიცია თავიდან უნდა ყოფილიყო აცილებული.