"ასეთი აწეული ტონით საუბარს ქართველ ჟურნალისტებთან არ კადრულობს არავინ, მე მოვუწოდებ, ტონს დაუწიოს", — განაცხადა "ოცნების" პარლამენტის თავმჯდომარემ, შალვა პაპუაშვილმა სამთავრობო ტელეკომპანია "იმედის" ჟურნალისტის კითხვაზე საპასუხოდ.

ტელეკომპანია "იმედის" ჟურნალისტის უკმაყოფილება გამოიწვია იმან, რომ, როგორც თავად აცხადებენ, "ქრონიკამ" 2 კვირის წინ გაგზავნა კითხვა ევროკავშირის ელჩისა და აქტივისტ ანანო ცინცაბაძის ერთობლივ ფოტოსთან დაკავშირებით, რაზეც პასუხი არ მიუღიათ.

"მე ვნახე ეს და არ ვიცი, რა დღეში ჰქონია ნერვები ევროკავშირის ელჩს, გასაკვირია პირდაპირ. ერთადერთი, რომ ვისურვებდი, რომ მან შესაბამის ტონში ისაუბროს ჟურნალისტებთან. და ეს ტონი, ასეთი აწეული ტონი საუბრისა ქართველ ჟურნალისტებთან, ამას არ კადრულობს არავინ, მიუხედავად კრიტიკული კითხვებისა, მიუხედავად ადევნებისა. ამას რომ ევროკავშირის ელჩი კადრულობს, რომ ასეთი ტონით ესაუბროს ქართველ ჟურნალისტს, მიუღებელია და მე მოვუწოდებ, ტონს დაუწიოს" — განაცხადა შალვა პაპუაშვილმა.

ამ საკითხზე პაველ ჰერჩინსკის კომენტარს ტელეკომპანია "იმედი" ავრცელებს:

"ეს კონკრეტული ქალბატონი, რომელზეც მეკითხებით იქ იყო. მთხოვა მასთან ფოტოსურათი გადამეღო. მე იმ დღეს ათობით თუ ასობით ფოტო გადავიღე სხვადასხვა ადამიანთან. შემდეგ თქვენ ამას დიდი ამბავი მოაყოლეთ. მე მოვიძიე ინფორმაცია, ასევე ვნახე ის, რაც თქვენ მოიკვლიეთ. ეს კონკრეტული ქალბატონი დასაქმებულია პოლონეთის სოლიდარობის ფონდის მიერ. ეს ორგანიზაცია პარტნიორობს ჩვენთან, სხვადასხვა ორგანიზაციებთან ერთად, ამ შესანიშნავ ამბიციურ პროექტში, რომ ვაი-ფაი მივაწოდოთ მთის სოფლებს. ეს ქალი მე პირველად ვნახე. როგორც მესმის აქტივისტია. ჩემთვის დიდი პრივილეგიაა, რომ მასთან ერთად ვაი-ფაის პუნქტი გავხსენი. ამ ეტაპზე მხოლოდ ამის თქმა შემიძლია.

მსურს კეთილსინდისიერად გთხოვოთ, რომ ნუ დამდევთ, ნუ დამყვებით და თავს ნუ დამესხმებით. ეს შესანიშნავი იქნება, მითუმეტეს ახლა, როცა ძალიან დაძაბული გარემოა საქართველოში 4 ოქტომბრის არჩევნებამდე. არ მსურს, რომ საარჩევნო კამპანიაში ჩათრეული აღმოვჩნდე. იმედია ამომწურავი პასუხი გაგეცით.

[…] "ევროკავშირის დელეგაცია ჩემი თავმჯდომარეობით ყოველთვის გპასუხობთ კითხვებზე, რომლებიც გულწრფელი კითხვებია. თუკი მიგზავნით კითხვას: "ბატონო ელჩო, რატომ ხართ სპილო?“, ასეთ კითხვებზე პასუხს არ გაგცემთ", — განაცხადა ჰერჩინსკიმ.