ქართველი ემიგრანტების 31-მა ჯგუფმა და ორგანიზაციამ ევროკავშირის ქვეყნებიდან ევროპარლამენტს "მზიას სიის" მხარდაჭერით მიმართეს. ორგანიზაციაში ევროკავშირის ქვეყნების გარდა აშშ-დან, კანადიდან, შვეიცარიიდან, ისლანდიიდან, გაერთიანებული სამეფოდან, ნორვეგიიდან, მოლდოვადან, ავსტრალიიდან და ახალი ზელანდიიდანაც მიმართეს.

ორგანიზაციის განცხადებაში ვკითხულობთ, რომ ემიგრანტების აზრით, "სწორედ "მზიას სია" უნდა გახდეს ადამიანის უფლებების დარღვევებზე, თავისუფალ მედიასა და სამოქალაქო აქტივიზმზე ძალადობრივი თავდასხმების წინააღმდეგ მიმართული სასანქციო პაკეტის ინსტრუმენტის სახელი".

რა არის "მზიას სია"?

ორგანიზაციის ინფორმაციით, "მზიას სიაში" შევა რამდენიმე ასეული პირი, რომლებიც მონაწილეობდნენ მოქალაქეთა წინააღმდეგ ძალადობრივი ქმედებების დაგეგმვასა და განხორციელებაში, წამებასა და მათ შესახებ დეზინფორმაციის გავრცელებაში, ცრუ ჩვენებების მიცემასა და უსამართლო განაჩენების გამოტანაში.

შეგახსენებთ, მოსამართლე ნინო სახელაშვილმა "ბათუმელებისა" და "ნეტგაზეთის" დამფუძნებელ მზია ამაღლობელს 2 წლით თავისუფლების აღკვეთა მიუსაჯა. ამაღლობელზე სამართლებრივი დევნა იმ დროისთვის ბათუმის პოლიციის უფროსის, ირაკლი დგებუაძის სარჩელის საფუძველზე დაიწყო. დგებუაძემ სასამართლო პროცესზეც განაცხადა, რომ ქალი ჟურნალისტის გარტყმული სილისგან მან "ტკივილი იგრძნო".

განაჩენის გამოტანამდე მზია ამაღლობელი 8 თვე წინასწარ პატიმრობაში იმყოფებოდა. როდესაც მოსამართლე სახელაშვილმა ამაღლობელს ბრალი 353-ე მუხლი შედარებით "მსუბუქი" ბრალდებით გადაუკვალიფიცირა, რაც ჯარიმით გათავისუფლებას ითვალისწინებდა — სახელაშვილმა წინასწარი პატიმრობის მიუხედავად ამაღლობელს თავისუფლების აღკვეთა მიუსაჯა.