თბილისის მერობის დამოუკიდებელი კანდიდატი ალეკო ელისაშვილი ქართული ოცნების მერობის კანდიდატს, კახა კალაძეს დებატებში იწვევს. მისი თქმით, ის ნებისმიერ არხსა თუ ფორმატში მასთან დებატებისთვის მზადაა:

"მე მიმაჩნია, რომ თბილისის მოქალაქეები იმსახურებენ იმას, რომ კანდიდატები მუშტი-კრივზე კი არ ესაუბრებოდნენ, არამედ ესაუბრებოდნენ იმის შესახებ, თუ რას ვუპირებთ ჩვენ ამ ქალაქს. როგორ უნდა ვუშველოთ ამ ჯოჯოხეთურ საცობებს, რომლებშიც ყველა დავიტანჯეთ, რა უნდა ვუქნათ ამ მოშხამულ ჰაერს, შემცირებულ გამწვანებას, მონჯღრეულ საზოგადოებრივ ტრანსპორტს. მე მზად ვარ, დებატების დროს, დავასაბუთო როგორ გადავარჩენთ მე და ჩემი გუნდი ამ ქალაქს საშინელი პრობლემებისგან."

ელისაშვილის განცხადებით, მას ადრე სხვადასხვა ტელეარხიდან უკავშირდებოდნენ და ეკითხებოდნენ იყო თუ არა მზად ის კალაძესთან დებატებისთვის. მისივე თქმით, მისი მზაობის მიუხედავად შეთანხმება დებატებთან დაკავშირებით ყოველთვის იშლებოდა.

On.ge-ს ქართული ოცნების პრესსამსახურმა უთხრა, რომ ალეკო ელისაშვილის შეთავაზებას მოგვიანებით უპასუხებენ.