ნაციონალური მოძრაობის თავმჯდომარე თინა ბოკუჩავა, პარტიის გენერალური მდივანი პეტრე ცისკარიშვილი და პარტიის ლიდერი ლევან სანიკიძე "MEGOBARI აქტის" ინიციატორს, კონგრესმენ ჯო უილსონს შეხვდნენ. ამის შესახებ ინფორმაციას პარტიის პრესსამსახური ავრცელებს.

ნაციონალური მოძრაობის თავმჯდომარემ განაცხადა, რომ "MEGOBARI აქტი" აშშ-ში კვლავ აქტუალურია და ამის შესახებ ტყუილს "რუს-ქოცური რეჟიმი" ავრცელებს. მისივე თქმით, "როდესაც ეს რეჟიმი შეიცვლება საქართველოში არა მხოლოდ "ტრამპ ტაუერი" აშენდება" და პრეზიდენტი ტრამპის ინიციატივა საერთაშორისო ასპარეზზე დაბრუნდება.

"მორიგი ტყუილი, რომელსაც რუს-ქოცური რეჟიმი დღეს ავრცელებს არის ის, რომ "MEGOBARI აქტი", აშშ-ში აღარ არის აქტუალური, აღარ დგას დგას დღის წესრიგში, ეს, რა თმა უნდა, არ შეესაბამება სიმართლეს, აქტიურად მიდის განხილვები მათ შორის სენატში იმისთვის, რომ "MEGOBARI აქტი" მიება თავდაცვის აქტს, რომელსაც 63 წელია იღებს აშშ-ს საკანონმდებლო ორგანო და რა თქმა უნდა, წელსაც მიიღებს და ძალიან დიდი შანსია, რომ ეს მოხდეს "MEGOBARI აქტთან" ერთად, რაც იქნება წინაპირობა ივანიშვილის წინააღმდეგ პერსონალური სანქციების დაწესების. იმ ივანიშვილის წინააღმდეგ, რომელიც ფაქტობრივად დასცინოდა პრეზიდენტ ტრამპს, რომელმაც დაასამარა ტრამპის სასტუმროს პროექტი საქართველოში და პრეზიდენტ დონალდ ტრამპს კორუფციაში ადანაშაულებდა, როდესაც ამბობდა, რომ მას ფული გადაუხადეს. რა თქმა უნდა, როდესაც ეს რეჟიმი შეიცვლება საქართველოში არა მხოლოდ "ტრამპ ტაუერი" აშენდება, არა მხოლოდ პრეზიდენტი დონალდ ტრამპის ინიციატივა დაბრუნდება საერთაშორისო ასპარეზზე, როგორც ღირსეული და სანდო საერთაშორისო სტრატეგიული პარტნიორი ჩვენ მეგობრებისთვის", — განაცხადა თინა ბოკუჩავამ.