კოალიცია "ლელო — ძლიერმა საქართველომ" საარჩევნო პროგრამის პრეზენტაცია გამართა. პრეზენტაციაში კოალიციის ლიდერებმა განვითარების 9 მთავარი პრიორიტეტზე ისაუბრეს, კერძოდ: ახალი სარტყელი, ახალი შესაძლებლობა; თბილისი — მწვანე ქალაქი; საზოგადოებრივი ტრანსპორტის მოდერნიზება და განვითარება; უსაფრთხო სამშენებლო პოლიტიკა; თბილისი ავარიული სახლების გარეშე; მიუსაფარი ცხოველების პრობლემის სისტემური გადაწყვეტა; ჯანდაცვის განვითარება და უფასო მედიკამენტები; ახალი სოციალური პოლიტიკა; თბილისი — სუფთა ქალაქი.

ახალი სარტყელი, ახალი შესაძლებლობის ფარგლებში ლელო — ძლიერი საქართველო გეგმავს, რომ თბილისში 70-80 კმ სიგრძის, 3-3, ანუ ჯამში, 6-ზოლიანი წრიული პერიმეტრის ავტომაგისტრალი მოეწყოს.

თბილისი — მწვანე ქალაქის ფარგლებში, ლელო — ძლიერი საქართველო თბილისის ცენტრალური პარკების სისტემის შექმნას გეგმავს, რომლითაც არსენალის მთა, იპოდრომი, ცირკის მთა, ლაგუნა ვერე, ყოფილი ზოოპარკის ტერიტორია და უნივერსიტეტის უკანა ეზო ერთმანეთს საფეხმავლო ბილიკებით დაუკავშირდება. ამავე ინიციატივის ფარგლებში, თბილისის შემოგარენ მთებზე ლელო — ძლიერი საქართველო ერთიანი ტყე-პარკის შექმნას გეგმავს, რომლის ფართობიც 700 ჰექტარი იქნება. ეს სივრცე მოიცავს: კუს ტბას, მთაწმინდის პარკს, თაბორის მთას, ნარიყალას, გოლფის მოედნებს ბოტანიკურ ბაღსა და მიმდებარე ტერიტორიებს. ლელო — ძლიერი საქართველოს ინიციატივით, ამ ტერიტორიაზე აიკრძალება ავტომობილების მოძრაობა და ტერასები, ხიდები, გადმოსახედები, სათამაშო მოედნები, ბილიკები და სპორტულ-დასასვენებელი ინფრასტრუქტურა მოეწყობა.

საზოგადოებრივი ტრანსპორტის მოდერნიზებისა და განვითარების ფარგლებში, ლელო — ძლიერი საქართველოს საარჩევნო პროგრამაში აღნიშნულია, რომ პრიორიტეტი იქნება: მეტროპოლიტენის გაძლიერება და გაფართოება; სატრანსპორტო ხაზების დიფერენცირება; მიწისზედა ტრამვაის სისტემის დანერგვა; ახალი საბაგირო მარშრუტების მოწყობა; მტკვარზე სამდინარო ტრანსპორტის დაბრუნება; ელექტროველოსიპედების ხელმისაწვდომობის ხელშეწყობა; პარკირების პრობლემის აღმოფხვრა — ლელო — ძლიერი საქართველო ამბობს, რომ 5-ჯერ გაზრდის მუნიციპალური პარკირების ადგილებს და თბილისის ყველა უბანში მოეწყობა მრავალსართულიანი მუნიციპალური მიწისზედა და მიწისქვეშა პარკინგები;

სატრანსპორტო გეგმის განხორციელებაზე ჯამში 600 მილიონი ლარი დაიხარჯება.

უსაფრთხო სამშენებლო პოლიტიკის ინიციატივის ფარგლებში, "ლელო — ძლიერი საქართველო" სამშენებლო სტანდარტების გამკაცრებას გეგმავს, ასევე ინიციატივა ითვალისწინებს მშენებლობისას გარემოს დაცვის საკითხების წინ წამოწევას და უსაფრთხოების მექანიზმების მოდერნიზებას.

ლელო — ძლიერი საქართველოს საარჩევნო პროგრამაში ხაზგასმულია თბილისში ავარიული სახლების პრობლემა. ამის შესახებ ინიციატივაში "თბილისი ავარიული სახლების გარეშეა" აღნიშნული. ლელო — ძლიერი საქართველოს სპეციალური ფონდის შექმნას გეგმავს, რომელიც, როგორც საარჩევნო პროგრამაშია აღნიშნული, 5 წლის განმავლობაში 1 მილიარდ ლარს დახარჯავს და უზრუნველყოფს დედაქალაქში არსებული 10 ათასი ავარიული სახლის სრულ რეაბილიტაციას.

საარჩევნო პროგრამაში ასევე გაწერილია მიუსაფარი ცხოველების პრობლემის სისტემური გადაწყვეტის ინიციატივა. ინიციატივის ფარგლებში იგეგმება ცხოველთა მონიტორინგის სააგენტოს ბიუჯეტი სამჯერ გაზრდა, მობილური ვეტერინარული კლინიკების შექმნა. ასევე სრულად აღირიცხება ცხოველთა პოპულაცია.

ლელო — ძლიერი საქართველოს საარჩევნო პროგრამის მიხედვით, ჯანდაცვის განვითარებისა და უფასო მედიკამენტების შექმნის ინიციატივა დამატებითი მუნიციპალური პროგრამების შემოღებას ითვალისწინებს. საარჩევნო პროგრამაში აღნიშნულია, რომ თბილისის თითოეულ მცხოვრებს შესაძლებლობა ექნება, მიიღოს დამატებითი მომსახურება: უფასო სკრინინგი ყველაზე გავრცელებული დაავადების გამოსავლენად, კომპიუტერული ტომოგრაფიები და სისხლის ყველა სახის ანალიზები. ინიციატივის ნაწილია ადრეული ასაკიდან ჯანსაღი ცხოვრების წესის ადრეული პოპულარიზებაც.

ლელო — ძლიერი საქართველო ახალი მუნიციპალური პროგრამის დანერგვასაც გეგმავს, რომლის ფარგლებშიც პენსიონერებისთვის, შეზღუდული შესაძლებლობის მქონე და სოციალურად დაუცველი პირებისთვის, მრავალშვილიანი ოჯახებისთვის, მარტოხელა მშობლებისთვის უფასო გახდება შემდეგი ჯგუფების სარეცეპტო მედიკამენტები:

არტერიული წნევის მარეგულირებელი საშუალებები;
გულის იშემიური დაავადების სამკურნალო მედიკამენტები;
ანტი-არითმიული პრეპარატები;
ბრონქული ასთმის სამკურნალო საშუალებები;
ანტიბიოტიკები;
სისხლის გამათხელებელი საშუალებები;
გლაუკომის სამკურნალო საშუალებები;
კუჭ-ნაწლავის დაავადებების სამკურნალო საშუალებები;
შაქრიანი დიაბეტის სამკურნალო მედიკამენტები და საშუალებები.

ახალი სოციალური პოლიტიკის ინიციატივის ფარგლებში სკოლებში უფასო კვების დანერგვა და უფასო სასადილოების რეფორმა იგეგმება. ასევე, ინიციატივაში გათვალისწინებულია, რომ ყველა ომის ვეტერანისთვის პარკინგი და საქალაქო ტრანსპორტით მგზავრობა იქნება უფასო (განურჩევლად იმისა, თბილისელია ის, თუ არა).

ინიციატივა "თბილისი — სუფთა ქალაქის" ფარგლებში იგეგმება ლილოს ნაგავსაყრელის გაუქმება და დასავლური ფონდების დაფინანსებით, საყოფაცხოვრებო ნარჩენების გადამამუშავებელი ქარხნის აშენება. ასევე, პროგრამის მიხედვით, აშენდება მტკვრის გამწმენდი ნაგებობები და მერია დაიწყებს ჰაერის დაბინძურების მუდმივ მონიტორინგს.

ლელო — ძლიერი საქართველო თბილისელებს ჰპირდება, რომ თბილისის ბიუჯეტი იქნება აბსოლუტურად გამჭვირვალე და მოქალაქეები შეძლებენ მისი ხარჯვის მონიტორინგს, ასევე თბილისის ახალი მერი მოიწვევს საერთაშორისო აუდიტს, რომელიც შეისწავლის "ოცნების" მმართველობის პირობებში საბიუჯეტო რესურსების ფლანგვისა და კორუფციის შემთხვევებს. საარჩევნო პროგრამაში ასევე წერია, რომ თბილისის მუნიციპალიტეტის მერიისა და საკრებულოს თანამდებობის პირებისთვის ავტოპარკზე უარს იტყვიან.