"საქართველოს ხელისუფლებამ ევროკავშირს მიაწოდა შევსებული კითხვარი და რეკომენდაციები, რომლებიც კომისიას ჰქონდა გაცემული", — ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა. მისი თქმით, ოცნების გუნდი აგრძელებს "სამუშაო პროცესს ევროკავშირთან, რათა, ერთი მხრივ, დაცული იყოს უვიზო მიმოსვლა და, მეორე მხრივ, საქართველოს ეროვნული ინტერესები".

მისივე თემით, საქართველოს ხელისუფლება, როგორც პასუხისმგებლიანი ხელისუფლება, ყველაფერს აკეთებს, რომ შეასრულოს საერთაშორისო ვალდებულებები, მათ შორის, ევროკავშირთან უვიზო მიმოსვლის გამართულად ფუნქციონირებასთან დაკავშირებით.

"ისინი ცდილობენ, არარსებული პრობლემებიდან პრობლემები გააჩინონ და საკუთარი პოლიტიკური მიზნებისთვის დააზიანონ საზოგადოება. ვნახეთ, რომ არაერთი პროტესტი დაანონსეს. დღეს 31 აგვისტოა, ხვალ პირველი სექტემბერი – ჩვეულ რეჟიმში გააგრძელებს საქართველო განვითარებას. ამ საკითხს, ობიექტური კრიტერიუმებით, არანაირი პრობლემა არ ემუქრება. საქართველოს ხელისუფლებამ ევროკავშირს მიაწოდა შევსებული კითხვარი და რეკომენდაციები, რომლებიც კომისიას ჰქონდა გაცემული. ჩვენ ვაგრძელებთ სამუშაო პროცესს ევროკავშირთან, რათა, ერთი მხრივ, დაცული იყოს უვიზო მიმოსვლა და, მეორე მხრივ, საქართველოს ეროვნული ინტერესები", — განაცხადა ლევან მახაშვილმა.

შეგახსენებთ, რომ ევროკავშირს პირობების შესასრულებლად ქართული ოცნებისთვის ვადა 31 აგვისტომდე ჰქონდა მიცემული. წინააღმდეგ შემთხვევაში ქვეყანას შესაძლოა, ვიზალიბერალიზაცია შეუჩერდეს.

საგარეო და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმაც განაცხადა, რომ საქართველოს მთავრობას წერილს გაუგზავნეს, რომელშიც პირობები იყო მოცემული – ამ პირობების გარკვეულ ვადაში შეუსრულებლობის შემთხვევაში კი, მისივე თქმით, ქვეყანასთან უვიზო რეჟიმის შეჩერება მოუწევთ.

"ჩვენ ვხედავთ სერიოზულ უკუსვლას საქართველოში. ვიმსჯელებთ, დამატებით რისი გაკეთება შეგვიძლია. ყველა ვარიანტი განიხილება, მათ შორის უვიზო რეჟიმის შეჩერება და სხვა ელემენტებიც, რომლებიც საქართველოს მთავრობას გათვლების შეცვლას აიძულებს", — განაცხადა საგარეო და უსაფრთხოების საკითხებში ევროკავშირის უმაღლესმა წარმომადგენელმა.