ენმ გააგრძელებს ურთიერთობას ყველა დემოკრატიულ ძალასთან, გარდა ცალკეული ინდივიდებისა, რომელთა ქმედებები სცდება ყოველგვარ ეთიკურ ნორმებს. ამის შესახებ განცხადება ნაციონალურმა მოძრაობამ გაავრცელა. მათი თქმით, "დღეს ქვეყნის ბედს, რეჟიმის საერთაშორისო იზოლაციასთან ერთად, ქუჩის პროტესტი გადაწყვეტს. ამიტომ, აგრძელებენ ბრძოლას და მხარდამჭერების მობილიზაციას 13 სექტემბრის, 27 სექტემბრის, 4 ოქტომბრის აქციებისთვის".

"ადგილობრივ არჩევნებად წოდებული 4 ოქტომბრის რუსული სპეცოპერაციის დელეგიტიმაცია მასში არ მონაწილეობით მნიშვნელოვანი პოლიტიკური ამოცანა იყო, რომელიც ართანამშრომლობის მომხრე რვა პოლიტიკურმა პარტიამ ერთიანი პოზიციითა და მოქმედებებით მკაფიოდ გამოხატა. ჩვენი ეს საერთო მიზანი მიღწეულია და ამაში ლომის წილი ერთიან ნაციონალურ მოძრაობას მიუძღვის.

რაც შეეხება სამომავლო თანამშრომლობას, ერთიანი ნაციონალური მოძრაობა იყო, არის და იქნება ივანიშვილის რეჟიმის წინააღმდეგ დემოკრატიული პოლიტიკური ძალების კონსოლიდაციის მომხრე და გააგრძელებს ურთიერთობას ყველა დემოკრატიულ ძალასთან, გარდა ცალკეული ინდივიდებისა, რომელთა ქმედებები სცდება ყოველგვარ ეთიკურ ნორმებს.

დღეს ქვეყნის ბედს, რეჟიმის საერთაშორისო იზოლაციასთან ერთად, ქუჩის პროტესტი გადაწყვეტს. ამიტომ, ერთიანი ნაციონალური მოძრაობა აგრძელებს ბრძოლას და მხარდამჭერების მობილიზაციას 13 სექტემბრის, 27 სექტემბრის, 4 ოქტომბრის აქციებისთვის. ყველა საპროტესტო თარიღი არის ბრძოლის ხაზი, რომელზეც გადის საქართველოს გამარჯვება.

გამარჯვებისთვის აუცილებელია საზოგადოებრივ-პოლიტიკური ერთიანობა, საზოგადოების დაყოფისა და დაპირისპირების ნებისმიერი მცდელობა ივანიშვილის წისქვილზე ასხამს წყალს.

ერთიანი ნაციონალური მოძრაობა აგრძელებს ბრძოლას ქართველ ხალხთან ერთად და ეს ერთიანი ძალისხმევა აუცილებლად საერთო ეროვნულ გამარჯვებას მოიტანს!", — ნათქვამია განცხადებაში.

ცნობისთვის, პარტია ფედერალისტების ერთ-ერთმა ლიდერმა, თამარ ჩერგოლეიშვილმა News.On.ge-ს "ქარდზე" ნეგატიურ კომენტარების ავტორებს შეურაცხყოფა მათივე ფეისბუქ-პროფილებიდან აღებული მცირეწლოვანი ბავშვების ფოტოების გამოყენებით მიაყენა.

თამარ ჩერგოლეიშვილმა მოგვიანებით ბოდიში მოიხადა და News.On.ge-ს "ქარდზე" კომენტარები წაშალა.

საპასუხოდ, 28 აგვისტოს ენმ-ის თავმჯდომარემ, თინა ბოკუჩავამ ჩერგოლეიშვილის საქციელი დაგმო და 8 პარტიის ფორმატში მყოფ ოპოზიციურ პარტიებს მოუწოდა, თამარ ჩერგოლეიშვილთან ურთიერთობა დაასრულონ.