უკრაინული მედიის ინფორმაციით, ლვოვში უკრაინის უმაღლესი რადას ყოფილი თავმჯდომარე, ანდრეი პარუბი მოკლეს. Ukrainska Pravda-ს ცნობით, პარლამენტის მოქმედ წევრსა და მე-8 მოწვევის პარლამენტის სპიკერს 5-ჯერ ესროლეს, რის შედეგადაც პარუბი ადგილზე გარდაიცვალა.

ანდრეი პარუბის მკვლელობას უკრაინის პრეზიდენტი, ვოლოდიმირ ზელენსკი გამოეხმაურა:

"ანდრეი პარუბი გარდაიცვალა. მის ოჯახსა და ახლობლებს ვუსამძიმრებ. მკვლელობის გამოსაძიებლად და მკვლელის მოსაძებნად ყველა საჭირო ძალა და რესურსი მობილიზებულია," — განაცხადა ზელენსკიმ.

მომხდარზე დაწყებულია გამოძიება.

ანდრეი პარუბი 2016 წლის 14 აპრილიდან 2019 წლის 28 აგვისტომდე იყო უკრაინის უმაღლესი რადას თავმჯდომარე. ასევე, პარუბი იყო მე-6, მე-7 და მე-8 მოწვევების პარლამენტის დეპუტატი.