"მალე წარვადგენთ მკაცრი სანქციების მე-19 პაკეტს. პარალელურად, ჩვენ ვაგრძელებთ მუშაობას რუსეთის გაყინულ აქტივებთან დაკავშირებით, რათა წვლილი შევიტანოთ უკრაინის თავდაცვისა და რეკონსტრუქციის საქმეში" — ამის შესახებ ევროკომისიის პრეზიდენტმა ურსულა ფონ დერ ლაიენმა განაცხადა და გამოეხმაურა რუსეთის მიერ კიევზე განხორციელებული თავდასხმას, რომელსაც ბოლო ცნობებით, 18 ადამიანი ემსხვერპლა.

ევროკომისიის პრეზიდენტის ცნობით, ოკუპანტების თავდასხმის დროს ორი რაკეტა მოხვდა ევროკავშირის წარმომადგენლობის ოფისსაც, თუმცა არავინ დაშავებულა.

"სწორედ ამიტომ ვახორციელებთ მაქსიმალურ ზეწოლას რუსეთზე" — აღნიშნავს ლაიენი.

"აღშფოთებული ვარ კიევზე თავდასხმის გამო, რომლის სამიზნეც ჩვენი ევროკავშირის ოფისიც გახდა. ეს იყო დედაქალაქზე ივლისის შემდეგ ყველაზე სისხლიანი თავდასხმა დრონებითა და რაკეტებით. როგორც ხედავთ ეკრანზე ჩემს უკან, ეს იყო თავდასხმა ჩვენს დელეგაციაზეც. ახლახან ვესაუბრე ჩვენს ელჩის მოადგილეს და შვებით ამოვისუნთქე, რომ ჩვენი თანამშრომლებიდან არავინ დაშავებულა.

გუშინდელი თავდასხმა დიპლომატიური მისიის, ჩვენი კავშირის წარმომადგენლობის სიახლოვეს მოხდა. ორი რაკეტა დელეგაციას 50 მეტრის რადიუსში 20 წამში მოხვდა. ეს კიდევ ერთი საშინელი შეხსენებაა იმისა, თუ რა დევს სასწორზე. ეს აჩვენებს, რომ კრემლი არაფრის წინაშე არ გაჩერდება უკრაინის დასატერორებლად, ბრმად კლავს მშვიდობიან მოსახლეობას — კაცებს, ქალებსა და ბავშვებს. სწორედ ამიტომ ვახორციელებთ მაქსიმალურ ზეწოლას რუსეთზე. ეს ნიშნავს ჩვენი სანქციების რეჟიმის გამკაცრებას. მალე წარვადგენთ მკაცრი სანქციების მე-19 პაკეტს. პარალელურად, ჩვენ ვაგრძელებთ მუშაობას რუსეთის გაყინულ აქტივებთან დაკავშირებით, რათა წვლილი შევიტანოთ უკრაინის თავდაცვისა და რეკონსტრუქციის საქმეში. და რა თქმა უნდა, ჩვენ ვუზრუნველყოფთ ძლიერ, ურყევ მხარდაჭერას უკრაინისთვის, ჩვენი მეზობლისთვის, პარტნიორისთვის, მეგობრისთვის და მომავალი წევრისთვის.

ხვალ მე გავემგზავრები შვიდ წევრ სახელმწიფოში, რომლებიც აძლიერებენ და იცავენ ჩვენს გარე საზღვრებს რუსეთთან და ბელარუსთან. მსურს გამოვხატო ევროკავშირის სრული სოლიდარობა მათ მიმართ და გაგიზიაროთ ის პროგრესი, რომელსაც ჩვენ მივაღწიეთ ძლიერი ევროპული თავდაცვის ინდუსტრიის მშენებლობაში, განსაკუთრებით ჩვენი ერთობლივი თავდაცვის ინსტრუმენტის SAFE-ის მეშვეობით.

და ბოლოს, მინდა მადლობა გადავუხადო ჩვენს მამაც თანამშრომლებს ევროკავშირის წარმომადგენლობაში უკრაინაში. ისინი შესანიშნავ სამუშაოს ასრულებენ უკიდურესად რთულ პირობებში. ამ გზავნილს პირადად გადავცემ მათ კიევში შემდეგი ვიზიტის დროს," — განაცხადა ევროკომისიის პრეზიდენტმა.