ევროსაბჭოს ექსპერტთა საბჭომ "უცხოელი აგენტების რეგისტრაციის აქტის“ (ე.წ. FARA-ს) შესახებ დასკვნა გამოაქვეყნა, რომელიც იკვლევს 2025 წლის 1 აპრილს ოცნების პარლამენტის მიერ მიღებული "უცხოელი აგენტების რეგისტრაციის შესახებ" კანონის დებულებების თავსებადობას ევროპულ სტანდარტებთან.

ექსპერტთა დასკვნის მიხედვით, კანონით გათვალისწინებული ზომები სერიოზულ გავლენას მოახდენს გაერთიანების თავისუფლების უფლებაზე და ადამიანის უფლებათა ევროპული კონვენციით გარანტირებულ რამდენიმე სხვა უფლებაზე.

ამას გარდა, მისი მრავალი დებულება არ აკმაყოფილებს კანონით დადგენილ მოთხოვნას, რომელიც გამოიყენება ამ უფლებებსა და თავისუფლებებზე რაიმე შეზღუდვის დაწესებისას.

დასკვნის ავტორები სერიოზული ეჭვებს გამოთქვამენ, შეიძლება თუ არა კანონში არსებული ზოგიერთი დებულების მიღება ჩაითვალოს ლეგიტიმურ მიზნად შესაბამისი შეზღუდვების დაწესებისთვის. გარდა ამისა, კანონის დებულებების გარდაუვალი ეფექტის გათვალისწინებით, რომლებიც არასამთავრობო ორგანიზაციებს უკრძალავს უცხოური მხარდაჭერის მიღებას ევროპული სტანდარტების შესაბამისი მიზნების მისაღწევად, პერსონალური მონაცემების გამჟღავნების გადაჭარბებული ვალდებულებების, დამატებითი ინფორმაციის მოთხოვნების შეუზღუდავი ფარგლების, საჭირო ჩანაწერების შენახვის სირთულის და შესაძლო სასჯელების გადაჭარბებული ხასიათის გათვალისწინებით, ექსპერტები მიიჩნევენ, რომ კანონით გათვალისწინებული ზომები არ არის ისეთი, რომელიც შეიძლება ჩაითვალოს აუცილებლად დემოკრატიულ საზოგადოებაში.

ამ ვითარებაში, ექსპერტები ასკვნიან, რომ FARA-ს კანონის განხორციელება გამოიწვევს სერიოზულ და გაუმართლებელ ზიანს საქართველოს სამოქალაქო საზოგადოებაზე, შეუსაბამო იქნება ევროპის საბჭოს ამ წევრი სახელმწიფოს მიერ აღებული ვალდებულებების ფართო სპექტრთან და, შესაბამისად, იქნება სრულიად შეუსაბამო. შედეგად, ევროსაბჭოს ექსპერტთა საბჭო მიიჩნევს, რომ მიზანშეწონილი იქნება კანონის გაუქმება და მისი დებულებების განხორციელების აღსრულების ნებისმიერი ნაბიჯის გადადგმის შეწყვეტა.