კლინიკაში მოთავსებული შეზღუდული შესაძლებლობების მქონე 18 წლის გიორგი დავითურის ჯანმრთელობის მდგომარეობა დამძიმდა."მომატებულია ლეიკოციტები" — აცხადებს ბიჭის დედა, მაია ბარათაშვილი და აღნიშნავს, რომ პაციენტს აქვს მაღალი სიცხეც.

შშმ პირის დედას სურს, რომ ბიჭის ანალიზები რომელიმე ქვეყანაშიც გადაგზავნოს, სწორედ ამიტომ ის კლინიკიდან ოფიციალურ დოკუმენტის ითხოვს, რომელსაც არ აწვდიან.

უფლებადამცველი თამუნა იარაჯული ამბობს, რომ დედას კანონიერ უფლებას უზღუდავენ.

"დღეის მდგომარეობით, გუშინდელთან შედარებით რაც გვქონდა, ლეიკოციტები მომატებულია ანალიზში, რაც განაპირობებს იმის შიშს, რომ გაუარესებულია ანალიზების მდგომარეობა ამ მხრივ. სიცხე ჰქონდა გუშინ, რაც არ ჰქონდა აქამდე. რაღაც ახალი გვაქვს. პირველი დღე იყო ინფექციის მაჩვენებელი, წავიდა, მეორე დღე, იყო სიცხე დაგვემატა, იმატებს ეს ლეიკოციტები ყოველდღიურად ზემოთ-ზემოთ მიდის. კარგისკენ ჯერ-ჯერობით არაფერი არ მიდის.

აქედანაც მივმართავ საზოგადოებას, ყველამ იცის გიოს მდგომარეობა და ძალიან ვთხოვ ყველას, იქნებ რაღაცნაირად მოვბილიზდეთ და მოვახერხოთ, რომ თანხები რაღაცნაირად მოვაგროვოთ.

თვალის გახელის მეშინია, არ ვიცი რა მდგომარეობა დამხვდება. ამ მდგომარეობაში რომ არ ვიყო, რაღაც იმედის მომცემი იქნება არსებობდეს კიდევ ამიტომ მინდა, რომ გადავაგზავნოთ რომელიმე ქვეყანაში ბავშვის ანალიზები, მონაცემები, დიაგნოზი, რაც გვაქვს ხელში. ამიტომ ვითხოვ ამ კლინიკიდანაც, რომ სრული ინფორმაცია მქონდეს წერილობით, დიაგნოზი მქონდეს ბავშვის, რომ შევძლო სხვა ექიმებსაც ვაჩვენო და მათი აზრიც მოვისმინო. იქნებ არსებობს შანსი, რომ უკეთესი დღე გაგვითენდეს და ყოველდღიურად ერთი და იგივე მდგომარეობა არ იყოს, რომ რაღაცა ცუდი დაგვემატა კიდე," — განაცხადა მაია ბარათაშვილმა "TV პირველთან" საუბრისას.

შშმ უფლებადამცველის, თამუნა იარაჯულის განცხადებით, პაციენტზე სრულყოფილი ინფორმაციის გადმოცემას კლინიკისგან უკვე მეხუთე დღეა ითხოვენ.

"სამწუხაროდ, დედას უზღუდავენ იმ კანონიერ უფლებას, რასაც ჰქვია დოკუმენტის გადმოცემა. მეხუთე დღეა ვითხოვთ სრულყოფილი ინფორმაციის გადმოცემას პაციენტზე. ჩანაწერები, რომელი ექიმიც ჩაერთო, მაგალითად ჩაერთო ინფექციონისტი, გააკეთა ჩანაწერი, რა ანალიზები დანიშნა, რა პასუხები მოვიდა და რა მედიკამენტი დაემატა, აი, ეს არის სრულყოფილი ინფორმაცია," — განაცხადა უფლებადამცველმა.

შეგახსენებთ, რომ თავდაპირველად გავრცელდა ინფორმაცია, რომ 18 წლის გიორგი დავითურს სამმა საავადმყოფომ მიღებაზე უარი უთხრა. აღნიშნულის შესახებ მისი დედა, მაია ბარათაშვილი საუბრობდა. მისივე თქმით, ამ პროცესში ბევრი დრო დაიკარგა, რის გამოც მისი შვილის მდგომარეობა კიდევ უფრო გაუარესდა. ამ დროისთვის შშმ პირი კლინიკა "ჯეო ჰოსპიტალსშია" მოთავსებული.

"გთხოვთ, მიშველეთ, გადამარჩენინეთ შვილი.

ჩემი შვილი იბრძვის სიცოცხლისთვის, გიო იმყოფება რეანიმაციულ განყოფილებაში და ის არის ინტუბირებული.

ალბათ ყველამ გაიგეთ უკვე ჩემი გიოს მდგომარეობა, 3 დღის წინ დიდი ბრძოლის და 4 გამოვლილი კლინიკის შემდეგ ჯეო ჰოსპიტალში შევედით ამოუცნობი ტკივილებით, შემდეგ მოხდა გიოს სედაცია გაუსაძლისი ტკივილების გამო,დილას როდესაც ექიმი გამოვიდა მითხრეს რომ გიოს მდგომარეობა შეიცვალა, დამძიმდა და სუნთქვის უკმარისობის გამო მოხდა გიოს აყვანა რეანიმაციაში და ინტუბირება.

სამი დღის შემდეგ კიდევ არ ვიცი და არ მაქვს ზუსტი დიაგნოზი თუ რატომ მოხდა გიოს მდგომარეობის ესე დამძიმება. ამჟამად გიოს სიცოცხლე არის რისკის ქვეშ, გაუმჯობესება არანაირი არ გვაქვს პირიქით ანალიზების პასუხები უარესდება. სასწრაფოდ უნდა მოხდეს საზღვარგარეთიდან წამყვანი ექიმების ჩართვა და ჩამოყვანა.

გთხოვთ, გადამარჩენინოთ ჩემი გიოს სიცოცხლე, თითოეული ადამიანის თანადგომა ეხლა ჩემთვის არის სასიცოცხლოდ მნიშვნელოვანი, გთხოვთ დამეხმაროთ რომ არ დადგეს ის სავალალო შედეგი, რომელსაც ბევრი ექიმი ვარაუდობს.

საქართველოს ბანკი
მიმღები: მაია ბარათაშვილი (დედა)
#GE58BG0000000499168653
თიბისი ბანკი
მიმღები: მაია ბარათაშვილი (დედა)
#GE59TB7030445061100047", — დაწერა მაია ბარათაშვილმა სოციალურ ქსელში.