რუსეთის პრეზიდენტ ვლადიმერ პუტინსა და უკრაინის პრეზიდენტ ვოლოდიმირ ზელენსკის შორის შეხვედრა მომდევნო ორ კვირაში გაიმართება, — ამის შესახებ გერმანიის კანცლერმა ფრიდრიხ მერცმა ვაშინგტონში აშშ-ის პრეზიდენტ დონალდ ტრამპის, ზელენსკის და ევროპელი ლიდერების სამიტის შემდეგ განაცხადა.

"დარწმუნებული არ ვარ, რომ პუტინს ეყოფა გამბედაობა, სამიტზე ზელენსკისთან ერთად მივიდეს", — თქვა მერცმა.

გერმანიის მთავრობის მეთაურმა აღნიშნა, რომ ტრამპსა და ზელენსკის შორის შეხვედრის მოლოდინები "არა მხოლოდ გამართლდა, არამედ გადააჭარბა კიდეც". ამავდროულად, მერცმა ხაზგასმით აღნიშნა, რომ უკრაინის მხრიდან რუსეთისთვის ტერიტორიული დათმობები არ შეიძლება. პუტინის ამჟამინდელი მოთხოვნები შედარებადი იქნება შეერთებული შტატების მიერ ფლორიდის შტატის ტერიტორიის დათმობასთან. ასეთი გადაწყვეტილების მიღება მხოლოდ უკრაინას შეუძლია, თქვა მან.

ამავდროულად, მნიშვნელოვანია, რომ მოლაპარაკებების დაწყებამდე ცეცხლის შეწყვეტა მოხდეს, თქვა მერცმა. ის ასევე მიესალმა შეერთებული შტატების ფუნდამენტურ მზადყოფნას, მონაწილეობა მიიღოს უკრაინისთვის უსაფრთხოების გარანტიების მიწოდებაში. ისინი ძალიან ხანგრძლივ და ინტენსიურ დისკუსიებს საჭიროებენ და "თუ სამშვიდობო შეთანხმება დაიდება, უკრაინას შესაბამისი უსაფრთხოების გარანტიები ექნება", — განაცხადა გერმანიის კანცლერმა.