უკრაინის პრეზიდენტი ვოლოდიმირ ზელენსკი, ვაშინგტონში გამგზავრებამდე ბრიუსელში ჩავიდა და ევროკომისიის პრეზიდენტს, ურსულა ფონ დერ ლაიენს შეხვდა.

შეხვედრის შემდეგ გამართულ პრესკონფერენციაზე ზელენსკიმ განაცხადა, რომ "ტერიტორიების საკითხი შეიძლება მხოლოდ ლიდერებს შორის განიხილებოდეს, რუსეთი კი არ აჩვენებს ნიშნებს, რომ სამმხრივი შეხვედრა გაიმართება". პრესკონფერენციის დეტალებზე უკრაინული მედია წერს.

ამას გარდა, პრეზიდენტმა ზელენსკიმ განაცხადა, რომ მას არ აქვს დეტალური ინფორმაცია იმის შესახებ, თუ რა უსაფრთხოების გარანტიები განიხილეს ტრამპმა და პუტინმა ალასკაში.

ზელენსკიმ დასძინა, რომ ტრამპმა მას და ევროპელ ლიდერებს "ბევრი დეტალის" შესახებ უამბო.

"ის ფაქტი, რომ პრეზიდენტმა ტრამპმა უსაფრთხოების გარანტიების შესახებ გააკეთა მინიშნება, ჩემთვის ბევრად უფრო მნიშვნელოვანია, ვიდრე პუტინის აზრი. რადგან პუტინი არანაირ უსაფრთხოების გარანტიას არ მოგვცემს", — თქვა ზელენსკიმ.

ამის შემდეგ განმარტება გააკეთა — რას გულისხმობს უკრაინის უსაფრთხოების გარანტიებში.

"უსაფრთხოების გარანტიები ძლიერი არმიაა. მხოლოდ უკრაინას შეუძლია ამის უზრუნველყოფა. მე მჯერა, რომ მხოლოდ ევროპას შეუძლია ასეთი არმიის დაფინანსება. ამ არმიისთვის იარაღის მიწოდება შესაძლებელია ჩვენი შიდა წარმოებისა და ევროპული წარმოების მიერ, მაგრამ არის ისეთი რამ, რაც მხოლოდ ამერიკის შეერთებულ შტატებს აქვს. ეს, მე მჯერა, რომ უსაფრთხოების გარანტიაა", — თქვა ზელენსკიმ.

მან დასძინა, რომ კითხვები იმის შესახებ, განლაგდებიან თუ არა უცხოელი ჯარები უკრაინაში და დაიცავენ თუ არა უკრაინის პარტნიორები უკრაინის ცას, პასუხგაუცემელი რჩება.

"ჩვენ ნამდვილად გვინდა მივიღოთ პასუხი ამ კითხვებზე, რათა გავიგოთ, რა არის უსაფრთხოების გარანტიები", — აღნიშნა პრეზიდენტმა.

ზელენსკიმ ხაზგასმით აღნიშნა, რომ რუსეთს „დონეცკის რეგიონში წარმატება ჯერ კიდევ არ აქვს, პუტინმა 12 წელია მისი ხელში ჩაგდება ვერ შეძლო. მან დასძინა, რომ უკრაინის კონსტიტუცია "შეუძლებელს ხდის ტერიტორიების დათმობას ან მიწებით ვაჭრობას".

მედიაში გავრცელდა ინფორმაცია, რომ ტრამპმა და ევროპელმა მოკავშირეებმა "NATO-ს მე-5 მუხლის მსგავსი“ უსაფრთხოების გარანტიები განიხილეს, მაგრამ არა NATO-ს ფარგლებში.

ეს საკითხი, სავარაუდოდ, ვოლოდიმირ ზელენსკის თეთრ სახლში ვიზიტის დროს, 18 აგვისტოს განიხილება. შეხვედრაში რამდენიმე ევროპული ქვეყნის ლიდერიც მიიღებს მონაწილეობას.