კამპანია ეს შენ გეხება ფარული მოსმენა-მიყურადების რეფორმის საკითხზე კანონპროექტების ინიცირების გაჭიანურებას ეხმაურება და აცხადებს, რომ კანონპროექტების დარეგისტრირება ივლისის თვეში არაგონივრული და დაგვიანებულია.

კანონპროექტის დარეგისტრირების თარიღის შესახებ ინფორმაცია რესპუბლიკურმა პარტიამ გაავრცელა. ეს შენ გეხებას წევრები თავიანთ განცხადებაში მათაც პასუხობენ:

"გაურკვევლია განცხადების გაკეთება ფრაქციის მიერ, ვინაიდან კანონპროექტის ინიციატორი არა ფრაქცია, არამედ კონკრეტული დეპუტატები უნდა ყოფილიყვნენ".

კამპანია ეს შენ გეხება განცხადებაში კანონპროექტის ივლისში დარეგისტრირების პროტესტის მიზეზსაც ხსნის. მისი თქმით, ივლისში კანონპროექტის ინიცირება განაპირობებს იმას, რომ მის განხილვას ამ მოწვევის პარლამენტი ვერ მოასწრებს, ხოლო მომდევნო მოწვევის პარლამენტს არ აქვს ვალდებულება კანონპროექტის განხილვა გააგრძელოს.

კანონპროექტის მომზადებას საფუძვლად ედო საკონსტიტუციო სასამართლოს მიერ კამპანია ეს შენ გეხებას წევრი ორგანიზაციების სარჩელის დაკმაყოფილება, რომლის თანახმადაც არაკონსტიტუციურად იქნა ცნობილი ფარული თვალთვალის/მიყურადების არსებული სისტემა.

საკონსტიტუციო სასამართლოს გადაწყვეტილებით 2017 წლის 31 მარტამდე უნდა შეიცვალოს მოქმედი სისტემა, რაც შესაბამისად გულისხმობს, როგორც კანონმდებლობის ცვლილებას ასევე ახალი მატერიალურ/პროგრამული სისტემის ამოქმედებას.

კამპანია ეს შენ გეხება საქართველოს პრემიერ-მინისტრთან შეხვედრასაც ითხოვს და იმედს გამოთქვამს, რომ მომავალი პარლამენტის პირობებში საკითხის განხილვის მიმართ უფრო მეტი ყურადღება და მხარდაჭერა იქნება მობილიზებული.