პოლონეთის პრემიერმინისტრის, დონალდ ტუსკის თქმით, პოლონეთმა შესაძლოა ოფიციალურად მოითხოვოს შენგენის წესებისგან გამონაკლისი, რათა გარკვეული ქვეყნების, მათ შორის საქართველოსა და სომხეთის, მოქალაქეებისთვის კვლავ შემოიღოს სავიზო მოთხოვნები. ამის შესახებ ინფორმაციას პოლონური მედია ავრცელებს.

იმავე დღეს, პოლონეთის შინაგან საქმეთა მინისტრის მოადგილემ RMF FM-ის რადიოსთან განაცხადა, რომ ასეთ ქვეყნებს შორის განიხილებიან საქართველო, სომხეთი, ვენესუელა და კოლუმბია.

Fakty po Faktach-ის ეთერში ტუსკმა განაცხადა, რომ ყოფილი საბჭოთა რესპუბლიკების მოქალაქეები "აშკარა მიზეზების გამო" უფრო მოწყვლადნი არიან რუსეთის სპეცსამსახურების მიერ გადაბირების მიმართ.

ბოლოდროინდელი ინფორმაციით, პოლონეთმა 32 ადამიანი დააკავა, რომლებიც რუსეთის დაზვერვასთან შესაძლო კავშირში არიან ეჭვმიტანილნი. დაკავებულთა შორის არიან უცხო ქვეყნის მოქალაქეები — მათ შორის რუსები, უკრაინელები და ერთი კოლუმბიელი — ასევე სულ მცირე ერთი პოლონელი მოქალაქე.