საქართველოს პრეზიდენტის საპარლამენტო მდივანი, ანა დოლიძე მმართველი პარტიის შეთავაზებას ეხმიანება და აცხადებს, რომ დოკუმენტმა, რომელიც საუკუნეებს უნდა უძლებდეს, საათებსაც ვერ გაუძლო.

ირაკლი კობახიძის შესთავაზა, რომ ვეტოს უფლება პრეზიდენტმა მხოლოდ ბონუსის სისტემის გაუქმებისა და ბლოკების ერთჯერადად შენარჩუნების ნაწილში გამოიყენოს.

ანა დოლიძის განცხადებით, საქართველოს კონსტიტუციის მიღებიდან რამდენიმე საათში მმართველი პარტია პრეზიდენტს სთხოვს, შეცვალოს ის დოკუმენტი, რომელიც პარლამენტმა მიიღო:

"საქმე გვაქვს საკმაოდ არასერიოზულ და წარმოუდგენელ ვითარებასთან. მრავალსაუკუნოვანი დოკუმენტი მიღებიდან მხოლოდ რამდენიმე საათში იცვლება. ეს არის კონსტიტუცია და არა ვინმეს ანგარიში. ჩვენ გვაქვს პასუხისმგებლობა და როგორც პასუხისმგებლობის მქონე ინსტიტუტი ვფიქრობთ, ამ ჩიხური ვითარებიდან ერთად გამოვიდეთ. დავიწყებთ შესაბამის ქმედებებს. ბუნებრივია, გავაგრძელებთ და დავიწყებთ კონსულტაციებს, მათ შორის ქართულ ოცნებასთანაც და სხვა პოლიტიკურ ძალებთან".

გუშინ, 26 სექტემბერს, ირაკლი კობახიძემ ტვ იმედის ეთერში განაცხადა, რომ ამით, პრეზიდენტს შეუძლია, საკონსტიტუციო ცვლილებების ექვსთვიან პროცესში პირველად ითამაშოს კონსტუქციული როლი.

"ექვსი თვის განმავლობაში, ის ასრულებდა დესტრუქციულ როლს ამ პროცესში, თუმცა ახლა შეუძლია პირველად შეასრულოს კონსტრუქციული როლი, ვეტო დაადოს კანონპროექტს იმ დაპირებების შესაბამისად, რომელიც ჩვენ მივეცით ვენეციის კომისიას. ვეტომ შეიძლება გაითვალისწინოს ბონუსის გაუქმება და ერთჯერადად ბლოკების დატოვება და ამ შემთხვევაში ჩვენ შევძლებთ, ორი კვირის თავზე ავამოქმედოთ დოკუმენტი, რომელიც სრულად შესაბამისობაში იქნება ვენეციის კომისიის რეკომენდაციებთან".

26 სექტემბერს, საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები.