შინაგან საქმეთა სამინისტროს გენერალური ინსპექციის თანამშრომლებმა, ქურდობის ბრალდებით დაცვის პოლიციის დეპარტამენტის საავიაციო უშიშროების სამმართველოს ინსპექტორი, მოსამართლის განჩინების საფუძველზე, დააკავეს. ინფორმაციას შინაგან საქმეთა სამინისტრო ავრცელებს.

უწყების ცნობით, ინსპექტორი მოქალაქის კუთვნილ ოქროს ნივთს ფარულად დაეუფლა.

ტელეკომპანია "პირველის" ინფორმაციით, დაცვის პოლიციის თანამშრომელმა ნივთი იმ დროს აიღო, როცა მგზავრი კონტროლის გასავლელად ემზადებოდა, მისი პირადი ნივთები სპეციალურ ყუთში მოათავსა და ე.წ.სკანერში გაატარა.

"ტვ პირველის ცნობით, ტელეკომპანიას აეროპორტის თანამშრომლები აცხადებენ, რომ მათ არ აქვთ შეხება მგზავრების კუთვნილ ბარგთან, თუმცა ისინი არიან იმ სივრცეში, სადაც ნივთების ჩაბარება ხდება.

"შინაგან საქმეთა სამინისტროს გენერალური ინსპექციის თანამშრომლებმა, გატარებული ოპერატიულ-საგამოძიებო მოქმედებების შედეგად, ქურდობის ბრალდებით დაცვის პოლიციის დეპარტამენტის საავიაციო უშიშროების სამმართველოს ინსპექტორი, მოსამართლის განჩინების საფუძველზე, დააკავეს.

გამოძიებით დადგინდა, რომ 1990 წელს დაბადებული მ.ბ. სამსახურებრივი მოვალეობის შესრულების დროს, მართლსაწინააღმდეგო მისაკუთრების მიზნით, ფარულად დაეუფლა მოქალაქის კუთვნილ ოქროს ნივთს.

დანაშაული 3-დან 5 წლამდე თავისუფლების აღკვეთას ითვალისწინებს," — აღნიშნულია ინფორმაციაში.

უწყების ინფორმაციით, ქურდობის ფაქტზე გამოძიება სისხლის სამართლის კოდექსის 177-ე მუხლით მიმდინარეობს.