საქართველოს 4 მოწვევის (1992, 1995, 1999, 2016) პარლამენტის წევრი, ადა მარშანია მიიჩნევს, რომ 4-დან 7 წლამდე პატიმრობა, რაც მზია ამაღლობელს ემუქრება, თანაზომიერი სასჯელი არ არის. ამის შესახებ მან Netgazet-ს განუცხადა.

"თვითონ ფაქტი არის ძალიან მძიმე და არასასიამოვნო. რა თქმა უნდა, რეზონანსულია გასაგები მიზეზების გამო. თუ ადრე გამიკვირდებოდა ეს ყველაფერი, ახლა უკვეა არ მიკვირს ოცნების ხელში. ყოველდღიურად ძალიან ცუდად იქცევა დღევანდელი ხელისუფლება.

მე არ მიმაჩნია, რომ ეს არის თანაზომიერი სასჯელი. აქ ის არის სპეციფიკა, რომ ხელისუფლების წარმომადგენელს, რომელიც იყო უნიფორმაში, სილა გააწნა. ეს სიმბოლურად აღქმულია, რომ ხელისუფლებას გააწნა სილა და ამიტომაც არის ასეთი მიდგომა, ასეთი სისასტიკე და სიმკაცრე. რა თქმა უნდა, ხელისუფლებამ თავის თავი და პრესტიჟი უნდა დაიცვას, მაგრამ უამრავი საშუალება აქვს, რომ სახე შეინარჩუნოს და არ ჩაუღრმავდეს ამ ფაქტს" — განაცხადა ადა მარშანიამ.

მისივე თქმით, ქართული ოცნების ხელისუფლების მიერ მზია ამაღლობელის დასჯა, მიანიშნებს რომ ოცნების მთავრობა თავს მყარად არ გრძნობს.

"ქალბატონი იყო ემოციებში და გასაგებია მისი მდგომარეობა, მე, მაგალითად, მესმის. რა თქმა უნდა, მას სამაგალითოდ სჯიან და აღიქვეს ისე, როგორც მათ მიმართ გაწნული სილა. ეს იმას ნიშნავს, რომ ძალიან ცუდად გრძნობს ხელისუფლება თავს და ამიტომ ჩაუღრმავდა ამ ფაქტს. ე.ი. არ გრძნობს თავს მყარად და ავტორიტეტიანად.

ადამიანი როდესაც დარწმუნებულია თავის თავში, კარგ საქმეებს აკეთებს და პატივისცემით სარგებლობს საზოგადოებაში, ის ბევრ ვინმეს ბევრ რამეს პატიობს, რადგან მისი მდგომარეობა მყარი და გამართულია. როდესაც ასეთი მდგომარეობა არ აქვს ხელისუფლებას, ის ასე ჩაიციკლება. ამიტომ ხდება ეს ყველაფერი," — განაცხადა მან.

როგორც ადა მარშანია აღნიშნავს, მას არ აქვს მოლოდინი, რომ სასამართლო მზია ამაღლობელს სასჯელის გარეშე დატოვებს.

"სამწუხაროდ თუ საუბედუროდ, არ მაქვს იმედი, რომ [მზია ამაღლობელს პატიმრობას არ მიუსჯიან]. ეს არის ცუდი არა მხოლოდ კონკრეტულად ამ ფაქტის გამო და ქალბატონი მზიას გამო, საერთოდ საზოგადოებისთვის ცუდი ფაქტი იქნება, რომ ხელისუფლება ასეთ მდგომარეობაშია და ასე არის განწყობილი," — განაცხადა ადა მარშანიამ.