რუსეთის კომუნიკაციების ზედამხედველობის ორგანოს ხელმძღვანელი, ალექსანდრ ჟაროვი ფეისბუკის დაბლოკვით დაიმუქრა, წერს Interfax. მისი თქმით, თუ ფეისბუკი მომხმარებელთა მონაცემების შესახებ ინფორმაციას რუსეთში განლაგებულ სერვერებზე არ გადაიტანს, ქვეყნის ტერიტორიაზე ვებგვერდზე წვდომა შეიზღუდება.

2015 წელს რუსეთში ძალაში შევიდა კანონი "პერსონალური მონაცემების შესახებ". ახალი კანონის მიხედვით, ნებისმიერმა ადგილობრივმა და უცხოურმა კომპანიამ, რომელიც რუსეთის მოქალაქეებთან მუშაობს, ბაზების სისტემატიზაცია, დაგროვება, შენახვა და მოქალაქეების პირადი ინფორმაციის დაზუსტება რუსეთის ტერიტორიაზე არსებულ სერვერებზე უნდა გააკეთოს.

"კანონი ყველასთვის სავალდებულოა. ნებისმიერ შემთხვევაში მივაღწევთ იმას, რომ კანონი აღსრულდეს, წინააღმდეგ შემთხვევაში ფეისბუკი რუსეთის ტერიტორიაზე შეწყვეტს მუშაობას ისევე, როგორც ეს LinkedIn-ის შემთხვევაში იყო," - განაცხადა ჟაროვმა.

მისივე განმარტებით, ფეისბუკს რუსეთის ბევრი მოქალაქე იყენებს, მაგრამ ის ერთადერთი და უნიკალური სოციალური ქსელი არაა.

კომუნიკაციების ზედამხედველობის ორგანოს ხელმძღვანელმა აღნიშნა, რომ Twitter-მა მონაცემების ლოკალიზების თარიღად 2018 წლის შუა პერიოდი დაასახელა. 2016 წლის ნოემბერში რუსეთში დაიბლოკა LinkedIn.