"თუ პუტინს და სხვებს აინტერესებთ, რა მოხდება 51-ე დღეს, მე ვურჩევდი, რომ აიათოლას დაურეკონ", — ამერიკელი სენატორი, ლინდსი გრემი X-ზე წერს. მისი თქმით, "აშშ-ს პრეზიდენტის განცხადება უკრაინაში, ევროპელების მიერ დაფინანსებული, ამერიკული წარმოების იარაღის გაგზავნის შესახებ სასიამოვნო ამბავია".

"ასევე მნიშვნელოვანი იყო მისი განცხადება, რომ თუ საბრძოლო მოქმედებები 50 დღეში არ დასრულდებოდა, ის 100%-მდე ტარიფებს დააწესებდა იმ ქვეყნებზე, რომლებიც იაფ რუსულ ნავთობს ყიდულობენ და პუტინის ომარ მანქანას უჭერენ მხარს - რაც პუტინს ყველაზე მეტად აწუხებს.

თუ პუტინს და სხვებს აინტერესებთ, რა მოხდება 51-ე დღეს, მე ვურჩევდი, რომ აიათოლას დაურეკონ.

მე რომ ვიყო ქვეყანა, რომელიც იაფ რუსულ ნავთობს ყიდულობს და პუტინის საომარ მანქანას უჭერდეს მხარს, პრეზიდენტ ტრამპის სიტყვას დავიჯერებდი", — წერს სენატორი.

აშშ-ის პრეზიდენტმა დონალდ ტრამპმა მოსკოვს მოუწოდა, 50 დღის ვადაში მოაგვაროს უკრაინაში კონფლიქტი და დაემუქრა, რომ თუ ამას ვერ შეძლებს, სავაჭრო პარტნიორებს "ძალიან მკაცრ ტარიფებს" დაუწესებს. გარდა ამისა, აშშ და NATO კიევს "ძალიან დიდი რაოდენობით სამხედრო აღჭურვილობას" მიაწვდიან.

NATO-ს გენერალურ მდივან მარკ რუტესთან ერთად ოვალურ კაბინეტში დონალდ ტრამპმა განაცხადა, რომ იმედგაცრუებულია ვლადიმერ პუტინით და უკმაყოფილოა მოსკოვის პოზიციით უკრაინაში კონფლიქტის მოგვარების საკითხში.

"მეგონა, რომ შეთანხმება დიდი ხნის წინ უნდა მიგვეღო, მაგრამ ეს გრძელდება და გრძელდება", — თქვა თეთრი სახლის ხელმძღვანელმა.

მისი თქმით, მას ისეთი შეგრძნება ჰქონდა, თითქოს რუსეთთან უკრაინაში ომზე შეთანხმებას "დაახლოებით ოთხჯერ" მიაღწია.

"თუ 50 დღის ვადაში შეთანხმებას ვერ მივაღწევთ, ჩვენ ძალიან მკაცრ ტარიფებს დავაწესებთ, დაახლოებით 100%-იან ტარიფებს", — თქვა დონალდ ტრამპმა და დასძინა, რომ ეს იქნება "მეორადი ტარიფები", რომლებიც რუსეთის სავაჭრო პარტნიორებისკენ იქნება მიმართული.