ბოლო ცხრა თვის განმავლობაში, თურქეთის ხელისუფლებამ 500-ზე მეტი პირი, ძირითადად ოპოზიციური რესპუბლიკური სახალხო პარტიის (CHP) წევრები, დააკავა. ამის შესახებ ინფორმაციას Reuters ავრცელებს.

პრეზიდენტმა რეჯეფ თაიფ ერდოღანმა კორუფციული ქმედებები "რვაფეხას სქემას" შეადარა, რომლის საცეცები თურქეთის სხვადასხვა ნაწილებსა და საზღვარგარეთაა.

გამოძიება, როგორც ხელისუფლება აცხადებს, მიზნად ისახავს კორუფციის დიდი ქსელის ამოძირკვას. ათობით CHP-ის მიერ მართული მუნიციპალიტეტი უკვე ზედამხედველობის ქვეშაა. 14 არჩეული მერი, მათ შორის სტამბოლის მერი ეკრემ იმამოღლუ — რომელიც ერდოღანის მთავარ პოლიტიკურ მოწინააღმდეგედ ითვლება — სასამართლოს მოლოდინში პატიმრობაში იმყოფება. ეს იურიდიული კამპანია ბოლო წლებში, ოპოზიციის წინააღმდეგ ერდოღანის ერთ-ერთ ყველაზე აგრესიულ ნაბიჯად ითვლება.

CHP მტკიცედ უარყოფს კორუფციის ბრალდებებს და გამოძიებას პოლიტიკურად მოტივირებულ მცდელობად აფასებს, რომლის მიზანიც დემოკრატიული ოპოზიციის დათრგუნვაა. პარტიის ლიდერები ამბობენ, რომ ეს ქმედებები საფრთხეს უქმნის მართლმსაჯულების დამოუკიდებლობას და სამართლებრივ სისტემას პოლიტიკური ანგარიშსწორების იარაღად აქცევს. ამ კრიტიკის მიუხედავად, პრეზიდენტი ერდოღანი პოლიტიკურ ჩარევას უარყოფს. საჯარო განცხადებებში იგი ამტკიცებს, რომ სასამართლო დამოუკიდებელია და გამოძიება მთლიანად სამართლებრივ ჩარჩოში მიმდინარეობს.

ჯერჯერობით დაკავებულების წინააღმდეგ ბრალდებები არ წარდგენილა და სასამართლოს მასალები ხელმისაწვდომი არ არის. ადამიანის უფლებების ორგანიზაციები და ოპოზიციონერი აქტივისტები ამბობენ, რომ ხელისუფლებას ჯერ არ წარუდგენია რაიმე დამაჯერებელი მტკიცებულება. ამავდროულად, დაწყებულმა კამპანიამ თურქეთში პროტესტები გამოიწვია და დასავლეთის მთავრობები შეაშფოთა, თუმცა საერთაშორისო რეაქცია საკმაოდ ფრთხილია.

ცნობისთვის, დაპატიმრებების ტალღა 2023 წლის ადგილობრივ არჩევნებში CHP-ის მიერ მიღწეულ მნიშვნელოვან წარმატებებს მოჰყვა. მათ შორის იყო ადიამანი — ქალაქი, რომელსაც 2023 წლის მიწისძვრამ დიდი ზარალი მიაყენა და ადრე ერდოღანის მმართველობის სიმაგრედ ითვლებოდა.

თურქეთში შემდეგი არჩევნები 2028 წელს არის დაგეგმილი.