ზუგდიდში მერობის დამოუკიდებელი კანდიდატის, ზვიად სიჭინავას რამდენიმე ბილბორდი ჩამოვარდა. სიჭინავა სარეკლამო კომპანიას - OUtdooR.ge-ს, რომელსაც ბილბორდების განთავსება დაუკვეთა, არაკეთილსინდისიერსა და უპასუხისმგებლოს უწოდებს. ამ შინაარსის პოსტი სიჭინავამ ფეისბუკზე გაავრცელა.

"ამ დრომდე Outdoor.ge-ს არ მოუგვარებია საკითხი და არც ფიქრობს მის გამოსწორებაზე, ვფიქრობთ, რომ საქმე გვაქვს მიზანმიმართულ ქმედებასთან და აღნიშნული კომპანია მიზანმიმართულად აფერხებს ბილბორდებზე ხარვეზის აღმოფხვრას", - ვკითხულობთ მერობის კანდიდატის პოსტში, სადაც აღნიშნულია, რომ შესრულებული მომსახურება მათ აფიქრებინებს, რომ ამით "კომპანია დაკვეთას ასრულებს".

OUtdooR.ge-ში ამბობენ, რომ ზვიად სიჭინავას უკვე ესაუბრნენ და პრობლების აღმოფხვრასაც დაპირდნენ. კომპანიის განმარტებით, სიჭინავა რეკლამის განთავსების იმ დღეების საფასურს არ გადაიხდის, რა დროსაც ბანერები ჩამოცვენილი იყო.

"გუშინ [24 სექტემბერს] ტექნიკური ხარვეზის გამო, ჩამოვარდა ბანერი. სამწუხაროდ, გუშინ ღამით ვერ მოხერხდა ტექნიკური სამუშაოების შესრულება იმის გამო, რომ წვიმდა. დღეს გამოსწორდება ეს პრობლემა", - განუცხადა On.ge-ს OUtdooR.ge-ს გაყიდვების მენეჯერმა, თამარ ბურკაძემ.