ადამიანის უფლებათა დაცვისა და პატიმართა სოციალური უზრუნველყოფის საერთაშორისო ორგანიზაციის თავმჯდომარე გიორგი თევზაძე სერიალ "ჩემი ცოლის დაქალების" ერთ-ერთ სცენაში სამღვდელოებასთან დაკავშირებით გასული სცენის გამო, პოზიციის დაფიქსირების თხოვნით საპატრიარქოს მიმართავს.

"ერთ-ერთმა ბოლო სერიამ ალბათ საზოგადოებაში დატოვა შენიღბული სახით ქართული მართლმადიდებლური ეკლესიის მიმართ შეურაცხყოფის განცდა. დაუშვებლად მიგვაჩნია ასეთ სენსიტიური თემით მანიპულირება, ტელეკომპანიისა და მისი გადაცემების რეკლამირებისათვის. მსგავსი მიდგომები ნებსით თუ უნებლიეთ ეხება მართლმადიდებელი საზოგადოების ღირებულებებს", - ნათქვამია განცხადებაში.

ორგანიზაციის თქმით, მსგავსი პრეცენდენტების შემთხვევაში, გეგმავენ რომ ოფიციალური წერილით მიმართონ მარეგულირებელ ეროვნულ კომისიას სათანადო რეაგირებისათვის.

On.ge-სთან საუბარში გიორგი თევზაძე ამბობს, რომ სერიალის ზოგიერთი სიუჟეტი შეურაცხმყოფელია საზოგადოებისთვის:

"სერიალი ისე კაი საყურებელია, მაგრამ მიდგომები არის ცოტა შესაცვლელი".

ამის შესახებ On.ge დაუკავშირდა სერიალის სცენარის ავტორს ქეთი დევდარიანს, რომელმაც გვითხრა, რომ პრეტენზიის მოსმენის შემდეგ გაეღიმა.