თბილისის მერობის კანდიდატი ქართული ოცნებიდან, კახა კალაძე ამბობს, რომ რამდენიმე დღეა მიზანმიმართული ტყუილი ვრცელდება თბილისში, ზაჰესის ხიდის ჩანგრევასთან დაკავშირებით. კალაძემ ამის შესახებ ხიდთან მიმდინარე სამუშაოების დათვალიერების დროს ისაუბრა.

"ჩვენ არავის არ მივცემთ იმის შესაძლებლობას, რომ ტყუილი თქვას. მესმის, რომ უამრავი პრობლემაა. მერობის კანდიდატებმა ნება იბოძონ და ამ პრობლემებზე ისაუბრონ და არა მოგონილ თემებზე", - განაცხადა კახა კალაძემ და განმარტა, რომ ხიდამდე მისასვლელი გზა იყო ჩანგრეული.

ხუთი თვის წინ გახსნილი ზაჰესის ხიდის ჩანგრევის შესახებ ინფორმაცია 22 სექტემბერს გავრცელდა. On.ge-ს თბილისის მერიაში განუცხადეს, რომ ხიდის ნაწილის ჩანგრევა ჯორჯიან უოთერ ენდ ფაუერის მილის გასკდომამ გამოიწვია.

ზაჰესის ხიდის ჩანგრევის შესახებ ინფორმაცია ივნისშიც გავრცელდა. მაშინ ხიდის გახსნიდან ორი თვე იყო გასული. თბილისის მერიამ მიზეზი უხვი ნალექით ახსნა და განმარტა, რომ ღვარცოფმა გაარღვია ჯებირი და ჩამოშალა მიწა. სტუდია მონიტორის საგამოძიებო მასალის მიხედვით, მერიამ ზაჰესის ხიდი ტექნიკური შემოწმების გარეშე გახსნა.

თბილისის მერიამ ზაჰესის ხიდის აღდგენისთვის 4 მილიონი ლარი გამოყო. სარეაბილიტაციო სამუშაოები ორი წლის განმავლობაში მიმდინარეობდა. მერიის ინფორმაციით, მაღალი გამტარუნარიანობის მქონე ახალი ხიდი 50-წლიანი საექსპლუატაციო ვადით აშენდა.