მსოფლიო ბანი, პაატა ბურჭულაძე მერიას 4 ოქტომბერს დაგეგმილი ყრილობისთვის ბორის პაიჭაძის სახელობის სტადიონის დათმობას სთხოვს. შესაბამისი მოთხოვნით მან მერიაში განცხადება უკვე შეიტანა.

პაატა ბურჭულაძის თქმით, მათ სურთ, მოიწვიონ ყრილობა, რომელზეც ქართველმა ხალხმა უნდა გადაწყვიტოს რა მომავალი უნდა.

"ყველამ ვიცით, რომ ჩვენს ქვეყანაში ცვლილებები გარდაუვალია. ეს წარმოუდგენელია, რომ დიდი ხანი გაგრძელდეს. ჩემი აქ მოსვლის მიზეზი ის იყო, რომ ყრილობისთვის, რომლის ჩატარებაც გვინდა, მოგვცენ ბორის პაიჭაძის სტადიონი, რადგან ეს ერთ-ერთი ყველაზე დიდი ადგილია, სადაც შეიძლება, რომ დავეტიოთ. ამიტომ შევიტანეთ ეს განცხადება. ვცდილობთ, რაც შეიძლება უმტკივნეულოდ მოხდეს ხელისუფლების გადაბარება. ამიტომ გვინდა მოვიწვიოთ ყრილობა 4 ოქტომბერს, როდესაც თითქოს არჩევნები უნდა ყოფილიყო. გვინდა, მოვიწვიოთ ყრილობა, რომელზეც ქართველმა ხალხმა უნდა გადაწყვიტოს რა მომავალი უნდა", — განაცხადა ბურჭულაძემ.

მისი თქმით, არაფერს არაკონსტიტუციურს და არაკანონიერს არ ითხოვენ, ამიტომ არ აქვს მერიისგან უარის მოლოდინი.

"ვერ წარმომიდგენია, მერიამ რატომ უნდა გვითხრას უარი. არაფერს არაკონსტიტუციურს და არაკანონიერს არ ვაკეთებთ. ჩვენ გვინდა გვქონდეს ის ადგილი, სადაც დავეტევით. პატარა ადგილია პრინციპში — 55 ათასი კაცი ეტევა, მოედანზეც 25 000 რომ გავალაგოთ და დანარჩენი გარეთ იქნება. ყველაფერი კეთდება იმისთვის, რომ ეს ქვეყანა მშვიდობიანად გადმოვიბაროთ", — განაცხადა პაატა ბურჭულაძემ. კომენტარს IPN ავრცელებს.