"საფრანგეთი კიდევ ერთხელ ადასტურებს ისრაელის უფლებას, დაიცვას თავი და უზრუნველყოს საკუთარი უსაფრთხოება", — ამის შესახებ საფრანგეთის პრეზიდენტმა ემანუელ მაკრონმა განაცხადა. როგორც მან აღნიშნა, საფრანგეთმა მრავალჯერ დაგმო ირანის მიმდინარე ბირთვული პროგრამა და ამ მიმართულებით ყველა დიპლომატიური ზომა მიიღო.

ემანუელ მაკრონმა ყველა მხარეს დეესკალაციისკენ მოუწოდა.

"საფრანგეთმა მრავალჯერ დაგმო ირანის მიმდინარე ბირთვული პროგრამა და ამ მიმართულებით ყველა დიპლომატიური ზომა მიიღო. ამ კონტექსტში საფრანგეთი კიდევ ერთხელ ადასტურებს ისრაელის უფლებას, დაიცვას თავი და უზრუნველყოს საკუთარი უსაფრთხოება.

იმისათვის, რომ საფრთხე არ შეექმნას მთელი რეგიონის სტაბილურობას, ყველა მხარეს მაქსიმალური თავშეკავებისა და დეესკალაციისკენ მოვუწოდებ.

ისრაელის მიერ ირანსა და მის ბირთვულ პროგრამაზე მიტანილი იერიშების შემდეგ, დღეს დილით ეროვნული თავდაცვისა და უსაფრთხოების საბჭოს სხდომა ჩავატარე.

გატარდება ყველა აუცილებელი ზომა რეგიონში ჩვენი მოქალაქეებისა და დიპლომატიური თუ სამხედრო ობიექტების დასაცავად. ასევე მიღებული იქნება ყველა ზომა ეროვნული ტერიტორიისა და ჩვენი თანამოქალაქეების დასაცავად.

საფრანგეთი მზად არის ითანამშრომლოს ყველა პარტნიორთან, რათა ახლო აღმოსავლეთში დაძაბულობის შემცირებას ხელი შეუწყოს.

დღეს მქონდა საუბარი საუდის არაბეთის მემკვიდრე პრინცთან, იორდანიის მეფესთან, არაბთა გაერთიანებული საამიროების პრეზიდენტთან, კატარის ემირთან, გერმანიის კანცლერთან, დიდი ბრიტანეთის პრემიერმინისტრთან და აშშ-ს პრეზიდენტთან" — წერს ემანუელ მაკრონი სოციალურ ქსელ X-ზე.

ასევე იხილეთ: