თემურ ქათამაძე [გაფფარ ილმაზი] თურქეთში არ დაუკავებიათ. ამის შესახებ ინფორმაცია "სოციალური სამართლიანობის ცენტრმა" გამოცემა ბათუმელებს დაუდასტურა.

წინასწარი ინფორმაციით, საქართველოდან გაძევებული თემურ ქათამაძე ორდუს საგამოძიებო ორგანოში გამოჰკითხეს და გაათავისუფლეს. დეტალები ჯერ კიდევ ზუსტდება. ამ ეტაპზე თემურ ქათამაძესთან დაკავშირება ვერ ხერხდება.

"მისი მეგობრისგან გავიგეთ, რომ გაუშვეს, მაგრამ რა საფუძვლით გაუშვეს, რა პროცედურებია წინ, ჯერ ეს დეტალები გადამოწმებული არ არის,"― უთხრეს ბათუმელებს "სოციალური სამართლიანობის ცენტრში".

თემურ ქათამაძეს თურქეთის პროკურატურა, ბათუმელებისთვის მიწოდებული დოკუმენტების მიხედვით, ფეტულა გიულენთან კავშირს ედავება. იმ მიზეზით, რომ ქათამაძე შესაძლოა თურქეთში პოლიტიკური პატიმარი გახდეს, ადვოკატები სასამართლოში მისთვის ლტოლვილის სტატუსის მინიჭებას ითხოვდნენ, თუმცა საქართველოში სასამართლოებმა ამ მოთხოვნის დაკმაყოფილებაზე უარი თქვეს.

ცნობისთვის, თემურ ქათამაძე გუშინ, ღამის საათებში, საქართველოდან იძულებით გააძევეს.