ქართული ოცნება ტელეკომპანიებს "პირველს" და "ფორმულას" კომუნიკაციების ეროვნულ კომისიაში მაუწყებლობის შესახებ "კანონის ცალკეულ ნორმათა მოთხოვნების დარღვევას ედავება".

საჩივარი ტელეკომპანია "პირველის" წინააღმდეგ:

როგორც დოკუმენტშია მითითებული, ტელეკომპანია "პირველის" წინააღმდეგ არსებული "საჩივრის საფუძველია "მაუწყებლობის შესახებ" საქართველოს კანონის 54-ე, 59 პრიმა და 76-ე მუხლების” დარღვევა. ქართული ოცნება მიიჩნევს, რომ მოვლენების გაშუქებისას გამოყენებული ტერმინები — "რეჟიმი", "ოლიგარქის მსახური", "პრორუსული რეჟიმის დეპუტატი", "კლანის მსახური მოსამართლე", "რუსული კომისიის სხდომა", "ივანიშვილის რეჟიმი" — "პირადი შეფასებები და ბრალდებებია", არ არის გამიჯნული ფაქტი და შეფასება, რაც არღვევს კანონმდებლობას, რის გამოც ტელეკომპანიებს "შესაბამისი სანქცია" უნდა დაეკისროთ.

როგორც ტელეკომპანია "პირველის" ადვოკატი, თორნიკე მიგინეიშვილი წერს, "ეს არის კიდევ ერთი რეპრესირების სერიის დასაწყისი კრიტიკული მედიის წინააღმდეგ.

ტელეკომპანიის რამდენჯერმე დაჯარიმება და ფინანსური სანქცია ქმნის რეალურ რისკს მაუწყებლობის შეჩერების", — წერს ადვოკატი.

"ბოლო პერიოდში მაუწყებლობის შესახებ კანონში ბევრი ცვლილება შევიდა და არცერთი მათგანი არ არის მედიის ან მაყურებლის უფლებების გაუმჯობესების მიზნით. მიზანია, შეიზღუდოს კრიტიკული მედია", — განაცხადა მიგინეიშვილმა ტელეკომპანია "პირველის" ეთერში.

"ტვ პირველის" საინფორმაციო სამსახურის უფროსი ნოდარ მელაძე ოცნების ხელისუფლების პრემიერმინისტრის, ირაკლი კობახიძის ხელმოწერილ მინდობილობას აქვეყნებს, რომლის მიხედვითაც ის ნათია ბოკუჩავას კომუნიკაციების ეროვნულ კომისიაში ქართული ოცნების ინტერესების დაცვის უფლებამოსილებას აძლევს

ფოტო: ნოდარ მელაძე

"ქართული ოცნება, ირაკლი კობახიძის სახელით ითხოვს აგვეკრძალოს ამ ტერმინების გამოყენება ეთერში, ანუ ჟურნალისტმა და წამყვანმა არ ახსენოს "რეჟიმი", "ოლიგარქის მსახური", "პრორუსული რეჟიმის დეპუტატი" და ა.შ. მაგრამ, "კლანის მსახური მოსამართლე" და "სასამართლო კლანი" პარტიასთან რა შუაშია. ეს ხომ თქვენ არ გეხებათ. სასამართლო ხო დამოუკიდებელი ინსტიტუციაა და არა პარტიული დანაყოფი. აბა მურუსიძე, ჩინჩალაძის მაგივრად კობახიძე რატომ ჩივის.

საჩივრები მაინც წერეთ ისე კუდები რომ არ დარჩეს.

რა იქნება?

1. გაფრთხილება

2. ჯარიმა

3. მაუწყებლობის ლიცენზიის საკითხი — ანუ გათიშვა ეთერიდან", — წერს ნოდარ მელაძე.

ნოდარ მელაძე "ნეტგაზეთთან" საუბრისას ამბობს, რომ, ქართული ოცნება სარეკლამო ბაზარსაც უტევს და "იმ კომპანიების დიდმა ნაწილმა, რომლებიც "ტვ პირველის" ეთერში თავიანთ რეკლამას ათავსებდნენ, არხთან თანამშრომლობა გაწყვიტა".

"მათ წელს სარეკლამო ბაზარზეც მიიტანეს იერიში. იმ კომპანიების დიდმა ნაწილმა, რომლებიც "ტვ პირველის" ეთერში თავიანთ რეკლამას ათავსებდნენ, არხთან თანამშრომლობა გაწყვიტა.

მსხვილმა ქართულმა ბრენდმა, რომელთანაც 31 დეკემბრამდე გვქონდა კონტრაქტი, შუაში გაწყვიტა. გასაგებია, რომ ამ სქემის ამოქმედებაც დაიწყეს, გარდა პირდაპირი ფინანსური წნეხისა. იმის ფონზე, რომ "ტვ პირველის" ყურებადობა მზარდია და ახლა რეიტინგის ისტორიულ მაქსიმუმზე ვართ, რატომ შეიძლება პარტნიორს არ უნდოდეს რეკლამის განთავსება?

ხვალ გავიგებთ, როგორ აპირებენ კანონის აღსრულებას და მერე უკვე ჩვენც უნდა მოვძებნოთ გზები, როგორ უნდა ვიმაუწყებლოთ ისე, რომ მაყურებელს მოვუყვეთ რეალობა და დავიცვათ ჩვენი ტელევიზიაც", – აცხადებს მელაძე.

საჩივარი "ფორმულას" წინააღმდეგ:

რაც შეეხება ტელეკომპანია "ფორმულას", ქართული ოცნება მოითხოვს "მაუწყებლობის შესახებ" კანონით განსაზღვრული ახალი ნორმების დარღვევისთვის პასუხისმგებლობა დაეკისროს "ფორმულას" და ამოქმედდეს სანქცირების აღსრულების დროებითი წესი.

"მოცემულია ტერმინები, რომლებიც ხაზს უსვამს ქართული ოცნების პარლამენტს, სხვადასხვა თანამდებობის პირებისა თუ ინსტიტუტების არალეგიტიმურობასა და პოლიტიკურ მიკერძოებას: "არალეგიტიმური პარლამენტი", "ეგრეთ წოდებული პარლამენტის თავმჯდომარე", "ოლიგარქის დეპუტატი", "რეჟიმის საქალაქო სასამართლო".

განსაკუთრებით ყურადღება ეთმობა ქართული ოცნების მთავრობის "რეჟიმად მოხსენიებას". საჩივარში მრავალჯერ მოიცავს ისეთ ტერმინებს, როგორიცაა "რეჟიმის პატიმარი," რეჟიმის წარმომადგენელი" და ა.შ.

ქართული ოცნება "ფორმულას" ბიძინა ივანიშვილის "ოლიგარქად" მოხსენიების გამოც უჩივის.

რა შეიძლება დაემართოს "ფორმულას"— ოცნების კანონით გათვალისწინებული რეალური სანქციები:

• გაფრთხილება

კომისიამ შეიძლება გამოუცხადოს ფორმულას ოფიციალური გაფრთხილება — საჯარო ან წერილობითი.

• დავალება შინაარსის გამოსასწორებლად

მაგალითად: ვალდებულება მოიხადოს ბოდიში, გააშუქოს დამატებითი პოზიციები, ან წაშალოს ზოგი შინაარსი საიტიდან/სოცქსელიდან.

• ფინანსური ჯარიმა

ჯარიმის ოდენობა კანონით შეიძლება იყოს საკმაოდ სოლიდურიც — მაგალითად, წინა პრაქტიკით, ზოგჯერ ირჩევა მაუწყებლის ბიუჯეტის შესაბამისი წილი.

• დროებითი რეგულაცია ან შეზღუდვა

სანამ საბოლოო გამოძიება დასრულდება, კომისიას შეუძლია მოსთხოვოს დროებითი შეზღუდვები – მაგალითად, მსგავსი ტერმინების გამოყენების შეჩერება.

• ლიცენზიის ჩამორთმევა

ფორმულას მიერ განმეორებითი მძიმე "დარღვევების" შემთხვევაში, კომუნიკაციების ეროვნულ კომისიას უფლება აქვს ფორმულას ლიცენზია შეუჩეროს ან გაუუქმოს", — წერია "ფორმულას" მიერ გავრცელებულ ინფორმაციაში.

შეგახსენებთ, რომ ოცნების ხელისუფლების პარლამენტმა 1-ელ აპრილს დაუჭირა მესამე მოსმენით მხარი "მაუწყებლობის შესახებ" კანონში ცვლილებებს.

კანონის თანახმად, იზღუდება მაუწყებლის მიერ უცხოური ძალისგან პირდაპირი ან არაპირდაპირი დაფინანსების მიღება, მაუწყებლის ხარისხის რეგულირებისთვის ფართოვდება საქართველოს კომუნიკაციების ეროვნული კომისიის უფლებამოსილება, მუშაობის სტანდარტების ასამაღლებლად კი ე.წ. ბრიტანულ მოდელი ინერგება და მედიის რეგულირება კანონის რეგულირების სფეროში გადადის.

შეგახსენებთ, რომ კომუნიკაციების მარეგულირებელი კომისიის თავმჯდომარე, კახა ბექაური რამდენიმე ქვეყნის - ესტონეთის, ლიეტუვის და უკრაინის მიერაა დასანქცირებული.