რუსული მანსანკანის უმაღლესი ლიგის რედაქტორმა და გუნდ "სოკის" კაპიტანმა დმიტრი კოლჩინმა, Wanna Banana-სთან ინტერვიუში, რუსული პირველი არხი ცენზურაში დაადანაშაულა.

მისი თქმით, მანსანკანში გაქრა ნომრები პრეზიდენტებზე, ხოლო დარჩენილი ნომრები "აუცილებელი კომპლიმენტები" იყო. როგორც თვითონ ამბობს, ერთ-ერთ გუნდს რეპეტიციის შემდეგ მუსიკის შეცვლა მოსთხოვეს, რადგან შინაარსობრივად ის მთავრობისადმი უკმაყოფილებას გამოხატავდა და პირველ არხზე მას ვერ გაუშვებდნენ.

კოლჩინის თქმით, ის ადამიანები, რომლებიც ამა თუ იმ ნომრის "ბედს წყვეტენ", პირველ არხზე მუშაობენ. როგორც ადგილობრივი მედიასაშუალება, Lenta.ru წერს, მანსანკანის პრესსამსახურმა დიმიტრი კოლჩინის სიტყვები უარყო.

იუმორისტული გადაცემა მანსანკანი (КВН) რუსულ ტელესივრცეში 1961 წლიდან გადის. ესაა გადაცემა, სადაც გუნდები ერთმანეთს ორიგინალური და სახუმარო ნომრებით ეჯიბრებიან.

15 მარტს NATO-ს ბალტიისპირეთის ცენტრის სტრატეგიული კომუნიკაციის მიერ გამოქვეყნებული ნაშრომის მიმხედვით, რუსული მანსანკანი "პოლიტიკური კომუნიკაციის სტრატეგიულ იარაღად განიხილება". მათივე თქმით, გასართობი პროექტი კრემლთან ბრენდის მფლობელების ურთიერთობის ხარჯზე ვითარდება.